काठमाडौं । पर्सामा हनुमान जयन्तीको शोभा यात्राका क्रममा झडप भएपछि वीरगञ्जको मुख्य बजार क्षेत्रमा लगाइएको कर्फ्यू आज पनि जारी छ ।
जिल्ला प्रशासन कार्यालयले पूर्वमा भेडियाही चोक, पश्चिमतर्फ सिर्सिया पुल, उत्तरमा गण्डक चोक र दक्षिणमा शंकराचार्य गेटभित्र हिजो साँझ साढे ६ बजेदेखि आज मध्याह्न १२ बजेसम्म हिँडडुल, सभा समारोह, प्रदर्शन लगायत गतिविधि गर्न नपाउने कर्फ्यू आदेश जारी गरेको हो ।
प्रत्यक्षदर्शीका अनुसार हनुमान जयन्तीका अवसरमा निकालिएको शोभा यात्रा घन्टाघरदेखि दक्षिणतर्फ गएर फर्किने क्रममा वीरगञ्ज–३ छपकैयास्थित श्रीराम हल चोकनजिक अज्ञात समूहले ढुंगा प्रहार गरेपछि तनाव सिर्जना भएको थियो ।
त्यस क्रममा केहीले टायर बालेर प्रदर्शन गर्नुका साथै पसलका फर्निचर निकालेर जलाएका थिए ।
स्थिति नियन्त्रणमा लिन २ राउन्ड हवाई फायर र १ सय २५ राउन्ड अश्रुग्यास प्रहार गर्नुपरेको पर्साका प्रहरी प्रमुख एसपी गौतम मिश्रले जानकारी दिनुभयो ।
उनका अनुसार सशस्त्र प्रहरीका डीएसपीसहित २५ सुरक्षाकर्मी र करीब १५ स्थानीय बासिन्दा घाइते भएका छन् । हनुमान जयन्तीका अवसरमा वीरगन्जमा प्रत्येक वर्ष शोभायात्रा निकाल्ने गरिन्छ ।
