काठमाडौं । उच्चस्तरीय आर्थिक सुधार सुझाव आयोगले उपप्रधान एवं अर्थमन्त्री विष्णुप्रसाद पौडेललाई सुझाव सहितको प्रतिवेदन बुझाएको छ ।

यसअघि अन्तरिम प्रतिवेदन बुझाइसकेको आयोगले आज अन्तिम प्रतिवेदन बुझाएको हो । मुलुकको शिथिल अर्थतन्त्र सुधारका लागि आयोगले सुझाव सहितको प्रतिवेदन तयार पारेर सरकारलाई बुझाइएको बताएको छ । 

प्रतिवेदनमा अर्थतन्त्रलाई गतिशीलता प्रदान गरेर नागरिकको आत्मविश्वास अभिवृद्धि गर्न अत्यावश्यक रहेको र त्यसका लागि आर्थिक अवसर सिर्जना गर्ने, आर्थिक गतिविधि विस्तार गर्न प्रेरित गर्ने र अवसरहरुमाथि समान पहुँच सुनिश्चित गर्नु पर्ने लगायत सुझाव समेटिएको आयोगले जनाएको छ ।

सरकारले  पूर्व अर्थसचिव रामेश्वर खनालको अध्यक्षतामा आयोग गठन गरेको थियो । गत असोजमा गठन गरिएको आयोगमा राष्ट्रिय योजना आयोगका सदस्य प्रकाशकुमार श्रेष्ठ, त्रिवि अर्थशास्त्र केन्द्रीय विभागका प्रमुख रामप्रसाद ज्ञवाली, अर्थवीद् विश्वास गौचन र नीति अनुसन्धान प्रतिष्ठानका वरिष्ठ अनुसन्धानकर्ता कल्पना खनाल हुनुहुन्छ ।