इटहरी । सुनसरीको इटहरी चौकमा रहेका सेन्टर प्लाजामा आगलागी भएको छ । आगलागीका कारण प्लाजाको माथिल्लो तलामा रहेका केही मानिस फसेको आंशका गरिएको छ ।

सातौं तलामा फसेका मानिसहरुको उद्दारका लागि प्रयास भइरहेको जिल्ला प्रहरी कार्यालय सुनसरीले जनाएको छ । सातौं तलामा अड्किएका मानिसको संख्या भने यकिन छैन ।

इटहरीको मुख्य चौकमा रहेको सेन्टर प्लाजामा बिहान १० बजेतिर आगो लागेको हो । प्लाजामा रहेको होटल बरन्डामा आगलागी भएको प्रहरीले जानकारी दिएको छ ।

इटहरी उपमहानगरपालिकाको दुई वटा दमकल, छिमेकी पालिकाबाट गएका अन्य दमकलको सहयोगमा सुरक्षाकर्मी सहितको टोलीले नियन्त्रणको प्रयास गरिरहेका छन् ।

प्लाजामा बरण्डा होटलसहित, सिनेमा थिएटर र अन्य व्यापारिक पसलहरु रहेका छन् । आगलागीबाट प्लाजाको पाँचौ र छैटौ तलामा क्षति भएको छ । आगलागीको कारण खुलेको छैन ।