९ चैत, २०८१
काठमाडौ, भौतिक पूर्वाधार तथा यातायात मन्त्री देवेन्द्र दाहालले गणतन्त्रले के दियो भनेर भ्रम खोज्न छरिएको भन्दै परिवर्तनबाट प्राप्त उपलव्धिहरुलाई कसैले छेक्न नसक्ने बताउनु भएको छ ।  
शनिवार ललितपुरका विभिन्न ग्रामिण क्षेत्रका सडकहरुको निरीक्षणका लागि पुग्नु भएका उहाँले महाङ्काल गाउँपालिका कार्यालयमा आयोजीत अन्तरक्रियामा गणतन्त्रले दिएका उपलव्धिहरु उदाहरण सहित प्रस्तुत् गर्नुभयो ।

‘बिगतमा दुई लेनको एउटा मात्रै पूर्वपश्चिम राजमार्ग थियो, अहिले चार ओटा चार लेन सहितका राजमार्ग विस्तार भएका छन्, उत्तर–दक्षिण त्रिदेशीय पहुँच स्थापित गर्ने विभिन्न करिडोर र राजमार्गहरु धमाधम बनि रहेका छन्, ति मध्ये केहिको ब्रेकथ्रु भई सक्यो’ मन्त्री दाहालले प्रतिप्रश्न गर्दै भन्नुभयो, ‘नेपाल आधुनिक टनेल युगमा प्रवेश गर्दैछ, केहि महिनामानै नागढुंगा टनेलबाट गाडी चल्नेछन्, सिद्धबाबा अन्तिम चरणमा छ । अन्तर्राष्ट्रिय विमानस्थलहरु थपिएका छन्, फाष्टट्र्याक निर्माण पूरा हुने चरणमा । के यि सवै गणतन्त्र पछिका उपलव्धि होईनन् ?’

पूर्वाधारहरुको विकासले नागरिकको जीवन स्तरमा समेत सुधार ल्याई रहेको भन्दै मन्त्री दाहालले स्वास्थ्य, शिक्षा, कृषिको आधुनिकीकरण, स्वरोजगारी लगायतमा नागरिकको पहुँच अभिवृद्धी गणतन्त्रका उपलव्धिहरु रहेको बताउनुभयो ।

‘गणतन्त्रले नागरिकलाई अधिकारमात्र दिएको छैन, अवसरहरु पनि प्रशस्तै दिएको छ’, मन्त्री दाहालले भन्नुभयो, ‘सवै जाति, भाषा, लिंग, भुगोललाई संवैधानिक रुपमा अधिकार सम्पन्न गराउने देखि राज्यका हरेक अंगमा सवैको पहुँच स्थापित भएको कुरालाई ढाकछोप गर्न कसैले पनि गणतन्त्रले के दियो भनेर नागरिकलाई निराश बनाउन जरुरी छैन र यो नागरिकले पत्याउँदा पनि पत्याउँदैनन् ।’

वैकल्पिक सडकहरु विस्तार गरिने

त्यस क्रममा उहाँले वैकल्पिक सडकहरुको विकास र विस्तारले ग्रामिण क्षेत्रमा सडक सञ्जाल स्थापित गरिने समेत बताउनुभयो । जनप्रतिनिधी एवम् स्थानीयबासीहरुले राखेको लेले–चन्दनपुर–फापरवारी सडक निर्माण र विस्तारको मागलाई संवोधन गर्दै उहाँले पूर्वी नेपाल र संघीय राजधानीलाई जोड्न यो सडक नयाँ विकल्प हुन सक्ने भएकाले आवश्यक अध्ययन गरिने बताउनुभयो ।

सो क्रममा उहाँले उक्त सडकको सम्भाव्यता अध्ययन गर्न संघीय सडक सुपरीवेक्षण तथा अनुगमन कार्यालय काठमाडौका प्रमुख शुभराज न्यौपानेलाई निर्देशन समेत दिनुभयो । 
भेटमा पूर्व सांसद नवराज सिलवालले सो सडक खण्डलाई चतारा–धरान सडकमा जोड्न सके पूर्वी नेपाल जोड्ने वैकल्पिक रुट तयार हुने बताउनुभयो । उहाँले ललितपुरको दक्षिणी क्षेत्र संघीय राजधानी भित्र भएर पनि दुर्गम रहेको भन्दै उक्त सडक विस्तारले स्थानीको आर्थिक विकासमा समेत सहयोग पुग्ने बताउनुभयो । 

यस्तै एमाले केन्द्रिय सदस्य रुपनारायण श्रेष्ठ, ललितपुर अध्यक्ष पुरुषोत्तम आचार्य लगायतले लेले–चन्दनपुर–फापरवारी सडकलाई वीपी राजमार्ग तथा पूर्वी तराईसँग जोड्न जरुरी रहेकोमा जोड दिनुभयो । 

यसैगरि महाङ्काल गाउँपालिकाका अध्यक्ष गणेशबहादुर केसी, कोन्ज्योस्याङ् गाउँपालिकाका अध्यक्ष कृष्णमान लामाले दक्षिणी ललितपुरलाई राष्ट्रिय सडक सञ्जालसँग जोड्न माग गर्नुभयो । सो क्षेत्रमा प्रदेश सरकार मार्फत सडक निर्माणको काम भई रहे पनि पर्याप्त नहुने भएकाले संघीय सरकारलेनै प्राथमिकतामा राख्नु पर्ने माग गर्नु भयो ।

मन्त्री दाहालले सडक डिभिजन कार्यालय ललितपुरका प्रमुख गोपाल खकुरेल, विभागका ईन्जिनियर प्रमोद खतिवडा एवम् प्राविधिकहरुको टोली सहित ग्रामिण सडकहरुको निरीक्षण गर्नु भएको हो ।