७ चैत, २०८१
काठमाडौ, भौतिक पूर्वाधार तथा यातायात मन्त्री देवेन्द्र दाहाल अमेरीकामा सम्पन्न यातायात सम्वन्धि एक अन्तर्राष्ट्रिय कार्यक्रममा भाग लिएर स्वदेश फर्कनु भएको छ । अमेरीकाको वासिङ्टन डीसीमा मार्च १० देखि विश्व वैंकको आयोजीत ‘ट्रान्सफर्मीङ् ट्रान्सपोर्टेशन २०२५’ मा भाग लिन गत फागुन २४ गते मन्त्री दाहाल नेतृत्वको टोलि त्यस तर्फ गएको थियो । 

उहाँ विश्व वैंकको प्रधान कार्यालयमा ‘सस्टेनेवल ट्रान्सपोर्ट मिनिष्टेरीयल राउण्ड टेवल’ को उद्घाटन शत्र तथा ‘ट्रान्सफर्मीङ् ट्रान्सपोर्टेशन’ मा नेपालको नेतृत्व गर्दै सहभागी हुनु भयो । उक्त कार्यक्रमलाई संवोधन गर्दै मन्त्री दाहालले नेपालको भौगोलिक विविधता र पर्यावरणीय दृष्टिकोणको महत्व दर्शाउँदै नेपालको सडक सञ्जाल र यातायात विस्तारमा सरकारको प्राथमिकता बारे अन्तर्राष्ट्रिय समुदायलाई प्रष्ट पार्नु भएको थियो ।  

सडक सञ्जालको सुधार र विकासमा सरकारको ध्यान केन्द्रित रहेको बताउँदै उहाँले, ग्रामीण क्षेत्रमा सडक सेवा विस्तार, सवारी साधनको लागत न्यूनतम राख्ने, र छोटा सडक सञ्जालको स्तरोन्नति गर्ने योजनाहरु प्रस्तुत् गर्नु भएको थियो । 

यस्तै मन्त्री दाहाल अमेरिका स्थित नेपालको राजदुतावासमा आयोजीत भेटघाट तथा अन्तरक्रिया कार्यक्रममा पनि सहभागी हुनुभयो भने नेपाली समुदायले आयोजना गरेको अन्तरक्रियालाई पनि संवोधन गर्नु भएको थियो ।

विदेशमा रहेका नेपालीहरुलाई निराश नहुन आग्रह

भौतिक पूर्वाधार तथा यातायात मन्त्री देवेन्द्र दाहालले प्रवाश तथा विदेशमा रहेका नेपालीहरुलाई निराश नहुन आग्रह गर्नु भएको छ । स्वदेश फर्कनु अघि अमेरीकाको टेक्सासमा रहेका नेपालीहरुको संस्था नेपाली समाज टेक्सासले गरेको स्वागत तथा सम्मान कार्यक्रमलाई संवोधनका क्रममा उहाँले नेपालमा केहि भएन भनेर गलत भाष्य निर्माण गर्न खोजिएको भन्दै त्यस्तो गलत प्रचारबाट निराश नहुन आग्रह गर्नु भएको हो । 

पछिल्लो समय पूर्वराजावादीहरुले लोकतान्त्रिक व्यवस्थालाई जिस्क्याउने दुष्प्रयास गरि रहेको भन्दै गणतन्त्र र लोकतन्त्रलेनै नेपालमा सामाजिक तथा भौतिक विकासको गति दिएको उल्लेख गर्नुभयो । गणतन्त्रलेनै नेपालका सवै क्षेत्र, भुगोल, बर्ग, जातजातीका नागरिकको अधिकारको प्रत्याभूत गरेको, राज्य व्यवस्थामा पहुँच स्थापित गरि रहेको, स्वास्थ्य–शिक्षा जस्ता आधारभूत क्षेत्रमा सेवा विस्तार भई रहेको र भौतिक पूर्वाधारको विकासले समेत तिव्रता पाई रहेको अवस्थामा देशमा केहि भएन भनेर भ्रम छर्नु कुनै पनि नेपाली र विश्वजगतले नपत्याउने कुरा भएको उहाँको भनाई थियो । 

अमेरिकाको टेक्सास राज्यमा नेपालीहरुको संख्या सबैभन्दा बढी भएकोले नेपाल सरकारले कन्सुलेट कार्यालय राख्ने निर्णय गरेको र यतिवेला अमेरिका सरकार समक्ष सो निर्णय जानकारी गराईएको भन्दै मन्त्री दाहालले अमेरिकाले एग्रीमो दिने वित्तिकै कार्यालय राख्ने लगायतका काम हुने जनाउनुभयो । 

यस्तै गैर आवासिय नेपालीहरुलाई १० बर्षको भिसा दिने निर्णय पनि वर्तमानमा ठिकै रहेको र भविश्यमा नागरिकताको सम्वन्धमा कानुन निर्माण गर्दा उचित निर्णय गरिने उहाँको भनाई थियो । कार्यक्रममा एनआरएनए टेक्सास, प्रवासी नेपाली मञ्च,नेपाली जन संम्पर्क मञ्च, पानस अमेरीका लगायतले मन्त्री दाहाल मार्फत नेपाल सरकारलाई आफ्ना सुझाव तथा जिज्ञासा राखेका थिए ।

मन्त्री दाहाल अमेरीका भ्रमणकै क्रममा अमेरिका स्थित नेपालको राजदुतावासमा भेटघाट तथा अन्तरक्रिया कार्यक्रम समेत सहभागी हुनु भयो । सो कार्यक्रममा अमेरिकामा बस्ने नेपालीहरुका समस्या, नेपाल र अमेरिका विचको सम्वन्ध, नेपालको लागी अमेरिका सँगका व्यापारिक सम्भावनाहरु र दुतावासका आन्तरीक समस्याहरु लगायतका बारेमा छलफल भएको थियो ।