काठमाडौं । अमेरिकाकाले यमनमा इरान–समर्थित हुथी विद्रोहीविरुद्ध ठूलो सैन्य हमला गरेको छ ।

राष्ट्रपति डोनाल्ड ट्रम्पले हुथी विद्रोहीमाथि निर्णायक र शक्तिशाली हवाई आक्रमण सुरु गरेको बताए । लाल सागर क्षेत्रको बन्दरगाहमा हुथी विद्रोहीले आक्रमण गरेपछि त्यसको बदला स्वरुप अमेरिकाले ठूलो सैन्य हमला गरेको हो ।

आक्रमणमा परि २४ जनाको मृत्यु भएको समाचार संस्था रोयटर्सले जनाएको छ । यमनको राजधानी सानामा अमेरिकी आक्रमणमा परि १३ जना सर्वसाधारणको मृत्यु भएको छ भने नौ जना घाइते भएको हुथी विद्रोहीद्वारा सञ्चालित स्वास्थ्य मन्त्रालयले जनाएको छ ।

उत्तरी प्रान्त सादामा चार बालबालिका र एक महिलासहित ११ जनाको मृत्यु भएको छ भने १४ जना घाइते भएका छन् । हुथी विद्रोहीको राजनीतिक ब्यूरोले अमेरिकाको सो आक्रमणलाई “युद्ध अपराध को संज्ञा दिएको छ ।
अमेरिकाका राष्ट्रपति ट्रम्पले हुथी विद्रोहीको मुख्य समर्थक इरानलाई तत्काल समर्थन रोक्न पनि इरानलाई चेतावनी दिएक छन् ।

एक अमेरिकी अधिकारीले यो आक्रमण हप्ता दिनसम्म जारी रहने बताएको रोयटर्सले उल्लेख गरेको छ । ट्रम्पले गत जनवरीमा पदभार ग्रहण गरेपछि मध्यपूर्वमा सबैभन्दा ठूलो अमेरिकी सैन्य कारबाही गरेका हुन्।

अमेरिकाले तेहरानमाथि नाकाबन्दीको दबाब बढाउँदै आणविक कार्यक्रमलाई लिएर वार्ताको टेबुलमा ल्याउने प्रयास गरिरहेको बेला सो आक्रमण भएको हो ।