काठमाडौं । घरजग्गाको कारोबारमा विस्तारै सुधार हुँदै गएको छ । घरजग्गाको कारोबार बढेसँगै गत फागुन महिनामा चार अर्ब १२ करोड रुपैयाँ बराबरको राजस्व संकलन भएको छ ।
देशभरको घरजग्गाको कारोबारको विवरण राख्ने भूमि व्यवस्थापन तथा अभिलेख विभागका अनुसार गत माघको तुलनामा फागुनमा राजस्व संकलनमा वृद्धि भएको हो ।
घरजग्गा कारोबार लयमा फर्कन थालेको र राजस्व संकलनमा समेत  वृद्धि हुँदै गएको विभागको तथ्यांकले देखाएको छ । । 
विभागले गत साउनमा  तीन अर्ब ८३ करोड ५० लाख, भदौमा  तीन अर्ब नौ करोड, असोजमा  तीन अर्ब आठ करोड १२ लाख, कात्तिकमा  दुई अर्ब ७० करोड ४० लाख, मङ्सिरमा  तीन अर्ब ८७ करोड, पुसमा  चार अर्ब २५ करोड २२ लाख र माघमा  तीन अर्ब ८७ करोड २४ लाख रुपैयाँ राजस्व संकलन गरेको जनाएको छ ।