काठमाडौं । नेपाल आयल निगमले पेट्रोलियम पदार्थको मूल्य घटाएको छ । निगमले एक विज्ञप्ति जारी गर्दै गएरातिबाट लागू हुनेगरी पेट्रोल, डिजेल र मट्टीतेलको मूल्य समायोजन गरिएको जानकारी दिएको हो ।
निगमले पेट्रोलमा प्रतिलिटर पाँच तथा डिजेल र मट्टीतेलमा प्रतिलिटर चार रुपैयाँ मूल्य घटाएको छ । इण्डियन आयल कर्पोरेसशनबाट हिजो प्राप्त नयाँ मूल्यसूची अनुसार पेट्रोल तथा डिजेलको नयाँ खरिद मूल्य घटेर आएकाले स्थानीय बजारमा मूल्य समायोजन गरिएको निगमले जनाएको छ ।
मूल्य समायोजनपछि अब काठमाडौं उपत्यका, पोखरा र दिपायलमा पेट्रोलको मूल्य प्रतिलिटर १ सय ६३ रुपैयाँ कायम गरिएको छ । डिजेल र मट्टितेलको मूल्य प्रतिलिटर १५१ रुपैयाँ तोकिएको निगमले जारी गरेको विज्ञप्तिमा उल्लेख छ ।
यस्तै, पहिलो वर्ग अन्तर्गत झापाको चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्जमा पेट्रोल प्रतिलिटर १ सय ६० रुपैयाँ ५० पैसा र डिजेल १ सय ४८ रुपैयाँ ५० पैसा तोकेको छ ।
यस्तै, दोस्रो वर्ग अन्तर्गत सुर्खेत र दाङमा पेट्रोल प्रतिलिटर १ सय ६२ रुपैयाँ र डिजेल लिटरको १ सय ५० रुपैयाँ तोकिएको छ ।
खाना पकाउने एलपी ग्यासको मूल्य भने यथावत राखिएको छ । पेट्रोलियम पदार्थको हकमा निगमको डिपो कार्यालयदेखि १५ किलोमिटरसम्मको दूरीको आधारमा खुद्रा बिक्री मूल्य तोकिएको निगमले जनाएको छ ।
