काठमाडौं । विकसित राजनीतिक घटनाक्रमको समीक्षा तथा पार्टीको आगामी रणनीति बनाउन राष्ट्रिय प्रजातन्त्र पार्टी राप्रपाको केन्द्रीय कार्यसम्पादन समितिको बैठक आज बस्दैछ ।
संवैधानिक राजसंस्थाको पुर्नस्थापना तथा हिन्दूराज्य लगायत माग राखेर गतिविधि अघि बढाएको राप्रपाले आन्दोलन मार्फत व्यवस्थाको खारेजीका लागि आगामी कार्यक्रम तय गर्न लागेको हो ।
गत साता काठमाडौंमा पूर्वराजा ज्ञानेन्द्र शाहको स्वागतमा गरेको ¥याली सभाबाट हौसिएको राप्रपाले आन्दोलनको जगमा व्यवस्था खारेजीतर्फ अग्रसर बनेको छ ।
पछिल्लो समय राजावादी समर्थित राप्रपासहितका दलको सक्रियता बढेसँगै त्यसको प्रतिकारमा गणतन्त्रवादी दलहरु उत्रिएका छन् ।
राप्रपाले आन्दोलनका कार्यक्रम अघि बढाउने तयारी गरिरहँदा प्रतिपक्षी दल सम्मिलित समाजवादी मोर्चाले चैत दोस्रो साता काठमाडौंमा सभाको गर्ने तयारी समेत गरेको छ ।
राप्रपाले उठाएका एजेण्डालाई जनतामाझ पु¥याउन पनि विभिन्न कार्यक्रम बनाउन केन्द्रीय कार्यसम्पादन समितिको बैठक बस्न लागेको पार्टी प्रचार विभाग प्रमुख एवं प्रवक्ता मोहन श्रेष्ठले जानकारी दिनुभयो ।
बैठकमा समसामयिक राजनीति, पार्टीको नीति, सिद्धान्त तथा पार्टीले यसअघि गरेका विभिन्न निर्णयहरुमा छलफल हुने प्रवक्ता श्रेष्ठको भनाइ छ । बैठक धुम्बाराहीस्थित पार्टी कार्यालयमा दिउँसो ३ बजे सुरु हुने पार्टी सचिवालयले जनाएको छ ।
