काठमाडौं । फागु पर्वलाई सभ्य र मर्यादित बनाउन प्रहरीले बिहानैदेखि विशेष चेकिङ गरेको छ । काठमाडौं उपत्यका ट्राफिक प्रहरी कार्यालयले होली चेकिङमा कडाइ गरेको हो ।
प्रहरीले विशेष गरी मादक र लागुपदार्थ सेवन गरी सवारीसाधन चलाउने माथि कडाइ गरेको हो । त्यसरी चलाइएका सवारीसाधनलाई होल्डमा राखिएको छ ।
काठमाडौं उपत्यकाका ८३ ठाउँमा सादा पोसाकका प्रहरीसहितको टोली परिचालित छ । उपत्यकाका ८३ ठाउँमा सिभिल पुलिससहित चेकिङ भइरहेको नेपाल प्रहरीका प्रहरी नायव महानिरीक्षक एवं केन्द्रीय प्रवक्ता दिनेश कुमार आचार्यले जानकारी दिए। त्यस्तै सुरक्षा चेकजाँचका लागि ६९४ जना ट्राफिक प्रहरी परिचालन गरिएको छ ।
हेल्मेट नलगाई चलाउने, दुईपांग्रेमा तीन\चारजना बसेर कुदाउने सवारीसाधनलाई पनि होल्डमा राखिएको आचार्यले बताए ।
बेलुकासम्म होल्डमा राखिने सवारीसाधनका धनीलाई कसुरअनुसार जरिवाना तिराएर सचेतना कक्षा लिन लगाइने ट्राफिक प्रहरीले जनाएको छ ।
झगडा र उच्छृंखल गतिविधि गर्नेलाई सादा पोसाकका प्रहरीको सहायतामा पक्राउ गरी कारबाही गरिने प्रवक्ता आचार्यले बताए ।
