काठमाडौं । रङहरूको पर्व फागु अर्थात् होली आज काठमाडौं उपत्यकासहित हिमाली र पहाडी जिल्लामा हर्षोल्लासका साथ मनाइँदै छ । तराईका जिल्लामा भने भोलि मनाइनेछ । 

पहाड र हिमाली क्षेत्रमा भन्दा एक दिन पछि तराईमा फागु पर्व मनाउने गरिएको छ । फागुको अवसरमा सरकारले आज पहाडी जिल्लामा सार्वजनिक बिदा दिएको छ ।

आपसी मेलमिलाप र सद्भावनाको सन्देश दिने फागु पर्व विभिन्न रङ र अबिर दलेर उमंगका साथ मनाउने परम्परा छ । असत्यमाथि सत्यको, अन्यायमाथि न्यायको, दूराचारमाथि सदाचारको र अधर्ममाथि धर्मको विजय भएको खुसियालीमा फागु पर्व मनाउने गरिन्छ ।

विभिन्न रंगीचंगी कपडाले सजिएको चीर ठड्याएपछि सुरु हुने पर्व पूर्णिमाको राति चीर दहन गरेपछि समापन हुने छ । 

यसैबीच, पर्वका अवसरमा राष्ट्रपति रामचन्द्र पौडेलले फागू पर्वले सामाजिक सद्भाव र राष्ट्रिय एकतालाई थप सुदृढ बनाउन योगदान पु¥याउने विश्वास व्यक्त गरेका छन् ।
उनले होली पर्वले समाजमा विद्यमान विभिन्न प्रकारका विकृति, विसंगति एवम् कुरीति हटाउँदै मौलिक संस्कृतिको संरक्षण र संर्वद्धन गर्न प्रेरणा प्रदान गरोस् भनी शुभकामना व्यक्त गरेका छन् ।

राष्ट्रपति पौडेलले जातीय, भाषिक र सांस्कृतिक रूपमा विविधतापूर्ण नेपाली समाजलाई विविधता बीचको एकता कायम गर्न पर्वले मद्दत पुग्ने विश्वास व्यक्त गरे ।
फागुको अवसरमा प्रधानमन्त्री केपी शर्मा ओली, उपराष्ट्रपति रामसहायप्रसाद यादव, नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाललगायत दलका नेताहरुले पनि शुभकामना व्यक्त गरेका छन् ।