काठमाडौं । रमपम विराट गोल्डकप फुटबल प्रतियोगिताको नवौं संस्करणको उपाधि भिडन्त आज हुने भएको छ । उपाधिका लागि सहिद स्मारक ‘ए’ डिभिजन लिग च्याम्पियन चर्च ब्वाइज युनाइटेड र थ्रीस्टार क्लब आमनेसामने हुनेछन् ।
विराटनगरको सहिद रंगशालामा हुने उपाधि भिडन्त साँझ ६ बजे सुरु हुनेछ । चर्च ब्वाइज पहिलो पटक विराट गोल्डकप जित्ने लक्ष्यमा हुँदा थ्रीस्टारको दोस्रो पटक च्याम्पियन बन्ने दाउ हुनेछ ।
थ्रीस्टारले पहिलो सेमिफाइनलमा त्रिभुवन आर्मी क्लबलाई ३–२ गोलले पराजित गर्दै फाइनलको यात्रा तय गरेको थियो । चर्च ब्वाइजले दोस्रो सेमिफाइनलमा विभागीय टोली नेपाल पुलिस क्लबलाई १–० गोलले पराजित गर्दै उपाधि नजिक पुगेको हो ।
चर्च ब्वाइज र थ्रीस्टारको यो सिजन पहिलोपल्ट विराट गोल्डकपको फाइनलमा भेट हुँदैछ ।
यसअघि थ्रीस्टारले पाँचौं विराट गोल्डकपको उपाधि जितेको थियो । सहिद रंगशालमा हिजो आयोजित प्रि–म्याच कन्फ्रेन्समा दुवै टिमका प्रशिक्षक र कप्तानले उपाधि जित्ने दाबी गरेका छन् ।
चर्च ब्वाइजका कप्तान एकराज बुढाथोकीले घरेलु दर्शकको साथ र हौसलाले उपाधि जित्ने दाबी गरे ।
थ्रीस्टारका प्रशिक्षक गणेश खड्काले मोफसलमा हुने प्रतिष्ठित विराट गोल्डकपको उपाधि उचाल्न उत्कृष्ट खेल प्रदर्शन गर्ने बताए ।
प्रतियोगिताको विजेताले ११ लाख र उपविजेताले ५ लाख रुपैयाँसहित ट्रफी पुरस्कार प्राप्त गर्नेछन् । विधागत उत्कृष्टले जनही १५ हजार रुपैयाँ पुरस्कार पाउनेछन् । प्रतियोगितामा नेपालका ८ र भारतका दुई गरी १० टिमले सहभागिता जनाएका थिए ।
