काठमाडौं । समाजवादी मोर्चाले राजावादीहरुको आन्दोलनलाई प्रतिवाद गर्ने निर्णय गरेको छ । नेकपा माओवादी केन्द्र, नेकपा समाजावादी एकीकृतलगायत दल आवद्ध समाजवादी मोर्चाले जनताले तिरस्कार गरिसकेको राजतन्त्रलाई पुनर्स्थापित गर्ने प्रयत्न भएको भन्दै सशक्त प्रतिवाद गर्ने निर्णय गरेको हो ।
आज बसेको मोर्चाको बैठकले गणतन्त्रका विरुद्ध गम्भीर षडयन्त्र भएको भन्दै सशक्त प्रतिवाद गर्न हजारौं नागरिकलाई सडकमा उतार्ने चेतावनी दिएको छ ।
राजावादीको आन्दोलन र प्रदर्शनलाई निष्तेज पार्न मोर्चाले प्रदर्शनका कार्यक्रम र योजना तय गरेको छ ।
मोर्चालाई मात्रै नभई प्रगतिशील, लोकतन्त्रवादी सबैलाई अमान्य भएको भन्दै यस्तो प्रयासको सशक्त प्रतिवाद गर्ने निर्णय भएको नेकपाका प्रवक्ता खड्ग विश्वकर्माले बताए ।
मोर्चाले चैत १५ गते काठमाडौंमा गणतन्त्रको पक्षमा र प्रतिगमन विरुद्ध हजारौं जनताको सहभागितामा विरोध प्रदर्शन र विरोध सभा गर्ने निर्णय भएको विश्वकर्माले बताए ।
कम्युनिस्ट मात्रै नभइ कांग्रेससहितका लोकतान्त्रिक दलसँग पनि वार्ता र संवाद गर्ने मोर्चाले जनाएको छ ।
