काठमाडौं । मेडिकल व्यवसायी तथा राजावादी अभियन्ता दुर्गा प्रसाईले राप्रपाका नेताहरुकै कारण राजतन्त्र गुमेको आरोप लगाएका छन् ।
उनले अध्यक्ष राजेन्द्र लिङ्देन र राप्रपा नेपालका अध्यक्ष कमल थापाका कारण नेपालबाट राजतन्त्र गएको दाबी गरेका हुन् ।
प्रसाईले निवासमा आज आयोजना गरेको पत्रकार सम्मेलनमा थापा र लिङदेनले २०७२ सालमा धोका नदिएको भए राजतन्त्र नजाने बताएका हुन् ।
राजतन्त्रको पुर्नस्थापनका लागि आफूहरुले माहोल बनाएपछि थापा र लिङ्देन ढोक्सा थाप्न आईपुगेको प्रसाईँले बताए । उनले आफू कलियुगको अर्जुन भएको हुँदा आफूलाई कमजोर नआक्न पनि चेतावनी दिएका छन् ।
प्रसाईले राजालाई सडकमा ल्याउने तागत आफूबाहेक अरु कोहीसँग नभएको पनि दाबी गरेका छन् ।
मूलधारका मिडियामाथि खनिँदै प्रसाईले ती मिडियाले निरन्तर पेल्दा पनि आफूले राजालाई सडकमा ल्याएरै छाडेको जिकिर गरे ।
उनले राजतन्त्र फर्काएबापत आफूलाई कुनै पनि लोभ नभएको बताए ।
कुनै लोभका कारण केही पाईएला भनेर राजतन्त्र फर्काउन नखोजेको उनको दाबी छ ।
प्रसाईले नेपालका सबै नागरिकलाई २० लाखसम्मको ऋण मिनाह गराउने आफ्नो पहिलो उदेश्य रहेको दाबी गरेका छन् ।
लघुवित्त, सहकारी र बैंकले घरबारविहीन बनाएकाहरुको घरजग्गा फिर्ता गराउनका लागि आफूले यो अभियान सञ्चालन गरिरहेको उनको दाबी छ ।
