झापा। झापाको कमल गाउँपालिकाले कमल नगर अस्पतालमा मानसिक रोगको उपचार र परामर्श सुरु गरेपछि सर्वसाधारण विस्तारै रोगका विषयमा खुल्दै गएका छन् ।
मानसिक रोग लुकाउने समाजमा यस्ता सेवाले नागरिकलाई समस्या सुनाउन सहज भएको हो ।
गाउँपालिका २ क्याम्पास्थित कमल नगर अस्पतालले मानसिक रोगको उपचार र परामर्श सेवा दिने विशेषज्ञ डाक्टरलाई खटाए पछि सर्वसाधारणमा मानसिक स्वास्थ्य चेतना बढ्दै गएको हो ।
दुई बर्ष अघिदेखि स्वास्थ्य बीमा कार्यक्रमसहित सेवा शुरु गरेको कमल नगर अस्पतालले सेवा विस्तारका क्रममा पछिल्लोपटक मानसिक रोग विशेषज्ञ डाक्टरसहितको सेवा ल्याएको पालिकाका अध्यक्ष हुकुमसिंह राईले बताए ।
वरिष्ठ मानसिक रोग विशेषज्ञ डा नवराज कोइरालाले अहिले अस्पतालबाट सेवा दिइरहेका छन् ।
हरेक महिनाको तेस्रो बुधबार मानसिक रोग विशेषज्ञ डाक्टरको सेवा शुरु गरिएको छ । एकैदिन २९ जनाले मानसिक रोग विशेषज्ञबाट सेवा लिएको अस्पताल प्रमुख दिपक दाहालले बताए । गत असोजदेखि शुरु भएको मानसिक स्वास्थ्यसम्बन्धि सेवा अघिल्लो महिना २७ जनाले लिएका थिए ।
अस्पताल सञ्चालन तथा व्यवस्थापन समिति अध्यक्ष समेत रहेका गाउँपालिका अध्यक्ष राईले गाउँघरमै सञ्चालित सरकारी अस्पतालबाट विशेषज्ञ सेवा दिन पाउँदा गर्व लागेको बताए । विशेषज्ञसहितको सेवा सुरु भएपछि स्थानीयले महँगो खर्च तिरेर टाढा जानु पर्ने बाध्यता हटेको छ । मानसिक स्वास्थ्य सम्बन्धि समस्या लिएर छिमेकी पालिकाबाट समेत बिरामी आउन थालेका छन् ।
छोटो समयमै अस्पतालले प्रवाह गरेको सेवामा धेरैको विश्वास बढ्दै गएको छ । स्थानीयको अस्पतालप्रति भरोसा बढ्दै जाँदा कमल नगर अस्पतालले अन्य विशेष सेवाहरू पनि थप्दै जाने योजना बनाएको छ ।
