काठमाडौं । नेपालले युगान्डामा जारी चार देश सम्मिलित वुमन्स डे कप टी–२० क्रिकेट अन्तर्गत आफ्नो तेस्रो खेलमा आज हङकङको सामना गर्ने भएको छ ।
नेपाल र हङकङबीचको खेल नेपाली समय अनुसार अपराह्न पौने ५ बजे सुरु हुनेछ । नेपाल आज दोस्रो जितको लक्ष्यमा हुनेछ ।
यसअघि हिजो भएको खेलमा घरेलु टोली युगान्डालाई पराजित गर्दै नेपाली महिला राष्ट्रिय क्रिकेट टोलीले लगातार नौ खेलको हारको शृंखला टुंग्याएको हो ।
नेपालले घरेलु टोलीमाथि १ विकेटको रोमाञ्चक विजय हात पारेको हो । शनिबार यसै प्रतियोगिताको पहिलो खेलमा नेपाललाई नामिबियाले ४ विकेटले हराएको थियो ।
प्रतियोगिता अन्तर्गत आजै हुने दोस्रो खेलमा युगान्डा र नामिबियाबीच प्रतिस्पर्धा हुनेछ ।
घरेलु टोली युगाण्डाले आफ्नो पहिलो खेलमा हङकङलाई हराएको थियो । हालसम्म सबै टोलीले २ खेलबाट २–२ अंक जोडेका छन् ।
आईसीसीको महिला टी–२० आई वरियतामा नेपाल २१ औं, हङकङ २२ औं, युगाण्डा १८ औं र नामिबिया १७ औं स्थानमा छन् ।
