काठमाडौं । इजरायलले गाजा क्षेत्रमा भइरहेको बिजुली आपूर्ति बन्द गरेको छ ।
लडाकु समूह हमासले मुक्त गर्न बाँकी ५९ बन्धकको रिहाइका लागि दबाब दिन इजरायलले बिजुली आपूर्ति बन्द गर्ने निर्णय गरेको हो ।
२० लाखभन्दा बढी जनसंख्या भएको सो क्षेत्रमा इजरायलले सबै सहायता रोकेको एक हप्तापछि ऊर्जा मन्त्री एली कोहेनको इलेक्ट्रिसिटी कर्पोरेसनलाई बिजुली आपूर्ति बन्द गर्न आदेश दिएको समाचार संस्था बीबीसीले जनाएको छ ।
उनले गाजा क्षेत्रका बिजुली आपूर्ति तुरुन्तै बन्द गर्ने निर्णयमा हस्ताक्षर गरिसकेको बताए । गत हप्ता इजरायलले गाजा क्षेत्रमा राहत सामग्री, तेल र अन्य वस्तु बोक्ने सवारी साधनलाई रोक लगाएको थियो ।
ऊर्जा मन्त्री कोहेनले एक भिडियो वक्तव्य जारी गर्दै बन्धकलाई फिर्ता ल्याउन र युद्धको भोलिपल्ट हमास गाजामा नरहेको सुनिश्चित गर्न आफूसँग भएका सबै उपाय प्रयोग गर्ने बताए ।
गाजा क्षेत्रमा खानेपानी पनि बन्द गर्नेबारे सोचिरहेको ऊर्जा मन्त्री कोहेनलाई उद्दृत गर्दै बीबीसीले जनाएको छ । इजरायलले हमासले आफ्नो युद्धविरामको पहिलो चरणको विस्तारलाई स्वीकार गर्न दबाब दिएको छ ।
तर, हमास भने युद्धविरामका लागि दोस्रो चरणको वार्ता सुरु गर्न चाहन्छ ।
