काठमाडौं । निर्माण कम्पनीको लापरबाहीले पूर्वी नवलपरासीस्थित कालीगण्डकी नदीमा निर्माणाधीन पुल विगत ९ वर्षदेखि अलपत्र छ ।
ठेकेदार सम्पर्कविहीन भएपछि पक्की पुलको काम अलपत्र परेको हो । काम अलपत्र पारेका ठेकेदारले १३ करोड भुक्तानी लिइसकेको छ ।
पूर्वी नवलपरासीको बुलिङ्टार र तनहुँको रिसिङ गाउँपालिका जोड्ने गरी कालीगण्डकी नदीमा २०७२ मा पुल निर्माण सुरु गरिएको थियो ।
निर्माण सुरु गरेको ९ वर्षमा ४५ प्रतिशत मात्र काम भएको पोखरास्थित पुल सेक्टर कार्यालयका इन्जिनियर विदुर सुवेदीले बताए ।
ठेकेदार कम्पनीले काम नसक्दै १३ करोड रुपैयाँ भुक्तानी लगिसकेको उनले जानकारी दिए ।
पुल निर्माणका लागि पटक–पटक ठेकेदार कम्पनीलाई लिखित रुपमा पत्र पठाउँदा समेत अटेर गरेको सुवेदीको भनाइ छ ।
पुल निर्माणका लागि संयुक्त रुपमा काम गर्ने गरी ३ कम्पनीले ठेक्का लिएका थिए ।
२६ करोड ८२ लाख रुपैयाँ लागतमा लुम्बिनी, स्वच्छन्द र नागार्जुन निर्माण कम्पनीले संयुक्त काम गर्ने गरी जिम्मेवारी लिएका हुन् ।
जिम्मेवारी पाएका तीन वटै ठेकेदार कम्पनी सम्पर्कमा नआएकाले काम पूरा हुन नसकेको पुल सेक्टर कार्यालयका इन्जिनियर सुवेदीको भनाइ छ ।
