काठमाडौं । श्रम बजारमा देखिएको समस्यालाई सम्बोधन गर्ने उद्देश्यले पाँचौं राष्ट्रिय श्रम तथा रोजगार सम्मेलन काठमाडौंमा आज सुरु हुँदैछ । श्रम, रोजगार तथा सामाजिक सुरक्षा मन्त्रालयको आयोजनामा आज र भोलि दुई दिने रोजगार सम्मेलन हुन लागेको हो ।
सम्मेलनमा श्रम क्षेत्रका विज्ञ र सरोकारवाला पक्षले भन्ने र सरकारले सुन्ने नीति लिइएको छ । श्रम शक्तिको यथोचित उपयोग गरी रोजगारी सिर्जना गर्ने क्षेत्रको संरक्षण र प्रर्वद्धन गर्दै तथा वैदेशिक रोजगारीबाट प्राप्त सीप, ज्ञान र पूँजीको सदुपयोग गर्ने लक्ष्य सरकारले राखेको छ ।
रोजगारी सिर्जनाका लागि नीति र कानूनमा सुधार गर्न सम्मेलन गर्न लागिएको श्रम मन्त्रालयले जनाएको छ । उत्पादन र उत्पादकत्व विस्तार गरी आन्तरिक रोजगारीको दिगो आधार खोज्न सम्मेलनले दिशानिर्देश गर्ने मन्त्रालयको दाबी छ ।
आन्तरिक श्रम बजारमा माग अनुसारको रोजगार उन्मुख प्राविधिक तथा व्यावसायिक सीपको विकासका लागि नीति र क्षमता विकासको अपरिहार्य भएको मन्त्रालयले जनाएको छ ।
सम्मेलनबाट आउने सुझावलाई श्रम मन्त्रालयले वैदेशिक रोजगार ऐनको परिमार्जन, राष्ट्रिय व्यावसायिक सीप विकास प्रतिष्ठानको परिमार्जन र सामाजिक सुरक्षा कोष तथा वैदेशिक रोजगार बोर्डको सुधारका लागि रणनीतिक योजना बनाउन समावेश गरिने मन्त्रालयले जनाएको छ । 
