काठमाडौं । राप्रपा सहितका राजावादी संघसंगठनले आज काठमाडौंमा प्रदर्शनको तयारी गरेका छन् । पोखरामा रहेका पूर्व राजा ज्ञानेन्द्र शाह काठमाडौं फर्कने समय पारेर उनीहरुले प्रदर्शनको तयारी गरेका हुन् ।

शाह दिउँसो तीन बजे त्रिभुवन विमानस्थलमा ओर्लिने बताइएको छ । पोखराका विभिन्न धार्मिक कार्यक्रम सकेर काठमाडौं फर्किदै गरेका पूर्व राजा शाहलाई विमानस्थलदेखि उनको निवास निर्मल निवाससम्म राप्रपा सहितका राजावादीहरुले हजारौंको संख्यामा उपस्थित भएर स्वागत गर्ने बताएका छन् ।

यसैबीच प्रशासनले उनीहरुको प्रदर्शनलाई मध्यनजर गर्दै सोही अनुसार सुरक्षा व्यस्था कडा पारेको छ । प्रहरी परिसर काठमाडौँका अनुसार प्रहरीसहित अन्य सुरक्षा फोर्स खटाउने तयारी छ ।

पछिल्लो समय राजतन्त्र पुनःस्थापना पक्षधरहरूको गतिविधि बढ्दै जादा प्रमुख राजनीतिक दलहरु रक्षात्मक देखिएका छन् । राजावादीहरूको गतिविधि बढेको भन्दै प्रमुख प्रतिपक्षी दल माओवादी केन्द्रले हुलाकी राजमार्ग केन्द्रित पूर्वपश्चिम अभियान स्थगित गरिसकेको छ ।