काठमाडौं । तराईका जिल्लामा राजावादी समूहको गतिविधि बढेपछि नेकपा माओवादी केन्द्रले ‘जनतासँग माओवादी, तराई–मधेश जागरण अभियान’ स्थगित गरेको छ ।
अभियानका क्रममा रौतहट पुगेका माओवादी नेताहरु कार्यक्रम स्थगित गरेर काठमाडौं फर्किन थालेका हुन् । माओवादीले सरकारको गलत रवैयाका कारण राजावादी शक्तिहरु सलबलाएको निश्कर्ष निकालेको छ ।
पश्चगामी शक्तिविरुद्ध सडक र सदनमा भूमिका बढाउने रणनीति तय गर्न माओवादीले भोलि पदाधिकारीको बैठक बोलाएको छ ।
प्रवक्ता अग्नी सापकोटाले भने ‘आज रौतहटमा चलेको अभियान स्थगित गरेका छौ, भोलिदेखि भने अभियान केही दिनका लागि स्थगित भएको छ ।
उनले राष्ट्रिय राजनीतिलाई हेरेर केही सरसल्लाह गर्नुपर्ने तथा कार्यक्रमलाई केही परिमार्जन गर्नुपर्ने कारणले तत्काललाई अभियान स्थगित गरिएको बताए ।
गत १२ फागुनबाट माओवादीले तराई–मधेशकेन्द्रित अभियान चलाइरहेको थियो ।
