डोटी । गृहमन्त्री रमेश लेखकले राजतन्त्र फर्काउने नाममा केही व्यक्तिले गरिरहेको प्रचारप्रसारको कुनै अर्थ नभएको बताएका छन् ।

पछिल्लो समय राजाको माग गर्दै भईरहेका आन्दोलनलाई संकेत गर्दै गृहमन्त्री लेखकले राजतन्त्र फर्काउने नाममा केही व्यक्तिबाट भएका होहल्ला काम नलाग्ने बताए  ।

डोटीमा आज आयोजित पत्रकार सम्मेलनमा उहाँले नेपालमा लोकतन्त्र विरुद्ध पहिलेबाट नै षड्यन्त्र भइरहेकाले त्यसप्रति सजग हुनुपर्ने बताए । गणतन्त्रको विकल्प राजतन्त्र नहुने गृहमन्त्री लेखकको भनाई छ । गृहमन्त्री लेखकले नेपाली समाज निरंकुशताबाट लोकतन्त्रमा आइसकेकाले राजतन्त्र फर्कने भ्रममा नपर्न समेत सुझाव दिए ।

उनले पूर्वराजा ज्ञानेन्द्र शाहलाई पार्टी खोलेर खुला छलफलमा आउन चुनौती दिए । नागरिक सरह पार्टी खोल्ने र चुनावमा लड्ने अधिकार शाहसँग सुरक्षित रहेको उनको भनाई छ ।