काठमाडौ । रङहरुको पर्व होली  अर्थात फागुपर्व आजदेखि सुरु भएको छ ।

काठमाडौंको बसन्तपुरमा रङ्गीचङ्गी ध्वजाले सजाइएको चीर ठड्याइएसँगै यो वर्षको होली पर्व सुरु भएको हो ।

फागुन शुक्ल अष्टमीका दिन हनुमानढोका दरबारको गद्दी बैठकको दक्षिणतर्फ चीर ठड्याएपछि देशभर फागु अर्थात् होली पर्व सुरु हुने गर्छ ।

आज बिहान मानन्धर समुदायले रंगीचंगी ध्वजासहितको चीर ठड्याएपछि उनीहरुले एकअर्कालाई अबिर दलेर होली पर्व सुरु भएको जनाउ दिएका छन् ।

त्यस्तै आजै पशुपति, हनुमानढोका दरबारको सुन्दरीचोक, ललितपुरको पाटन दरबार क्षेत्रको कृष्णमन्दिर परिसरमा पनि रंगीचंगी कपडा झुण्ड्याएर होली सुरु भएको जनाउ दिने गरिन्छ ।

यस वर्षको होली पर्वको मुख्य दिन फागुन २९ गते र चैत १ गते परेको छ । फागुन २९ गते हिमाली तथा पहाडी जिल्लामा र चैत १ गते तराई÷मधेशका जिल्लामा होलीको सार्वजनिक बिदा दिइएको छ ।