काठमाडौं । प्रधानमन्त्री केपी शर्मा ओली विभिन्न कार्यक्रममा सहभागी हुन आज सुर्खेत जाँदै हुनुहुन्छ । उहाँ विहान ११ बजेतिर त्यस तर्फ प्रस्थान गर्ने प्रधानमन्त्रीको सचिवालयले जनाएको छ ।
मध्यपश्चिम विश्वविद्यालयको तेस्रो दीक्षान्त समारोहमा सहभागी हुनका लागि प्रधानमन्त्री ओली आज सुर्खेत जान लाग्नु भएको हो ।
सुर्खेत विमानस्थलबाट प्रधानमन्त्री ओली मध्यपश्चिम विश्वविद्यालयको तेस्रो दीक्षान्त समारोहमा सहभागी हुने कार्यक्रम छ ।
विश्वविद्यालयका कुलपति समेत रहेका ओलीले दीक्षान्त समारोहको उद्घाटन गर्नु हुने छ । दीक्षान्त समारोहमा तीन हजार ८ सय ४१ जना विद्यार्थीहरू दीक्षित हुने विश्वविद्यालयले जनाएको छ ।
दीक्षान्त समारोहमा सहकुलपति एवम् शिक्षा, विज्ञान तथा प्रविधि मन्त्री विद्या भट्टराई, भारतको जवाहरलाल नेहरु विश्वविद्यालयका प्राध्यापक डा.महेन्द्र पी. लामा सहभागी हुने आयोजकले जनाएको छ ।
दीक्षान्त समारोह लगत्तै प्रधानमन्त्री ओलीले कर्णाली प्रदेशसभालाई विशेष सम्बोधन गर्ने कार्य तालिका छ ।
प्रदेश सभाको सम्बोधन पछि प्रधानमन्त्री ओलीले मध्यपश्चिम विश्वविद्यालयको इन्जिनियरिङ संकायको भवन उद्घाटन गर्ने कार्यक्रम राखिएको छ ।
तीन वर्षअघि नै निर्माण सम्पन्न भएर पठन–पाठन भइरहेको भवनको प्रधानमन्त्रीले आज उद्घाटन गर्न लाग्नु भएको हो । त्यसपछि प्रधानमन्त्री ओलीले कर्णाली प्रदेश रङ्गशालाको निरीक्षण गर्ने कार्यक्रम छ । जहाँ आगामी जेठमा १० औं राष्ट्रिय खेलकुद प्रतियोगिताको आयोजना गरिँदै छ ।
प्रधानमन्त्री ओली आजै काठमाडौं फर्किने उहाँको सचिवालयले जनाएको छ ।
