काठमाडौं । पाल्पाको रिब्दीकोट गाउँपालिका–१ र २ को संसारकोट डाँडामा हिजो दिउँसोदेखि लागेको डढेलो अझै निभाउन सकिएको छैन ।
हार्थोकदेखि देउराली हुँदै ख्याहा जोड्ने सडक अन्तर्गत तल्लो र माथिल्लो भागको डाँडा क्षेत्रमा भीषण डढेलो लागेको हो । सल्लाको जंगलमा लागेको डढेलो निभाउन तानसेन नगरपालिकाको दमकल, नेपाली सेना, सशस्त्र प्रहरी, जनपथ प्रहरी, सब–डिभिजन कार्यालयका कर्मचारी, स्थानीय बिहानैदेखि खटिएको वडा नम्बर–२ वडाध्यक्ष ओमप्रकाश पोखरेलले बताउनुभयो ।
ख्याहाको गैरागाउँ, देउरालीको पोखर डाँडा, लघुवा, डम्बक लगायत गाउँ डढेलोको जोखिममा रहेको छ । डढेलोले दुई वटा सामुदायिक वनका झण्डै १८ हेक्टर डडेलोले सखाप पारेको छ ।
हावा हुरी चलेकाले पनि डढेलो निभाउन नसकिएको डिभिजन वन कार्यालयका सूचना अधिकारी खिलबहादुर तामाङ्ले जानकारी दिए । बिजुलीको ट्रान्सफर्मर सर्ट भएर डढेलो लागेको स्थानीयले बताएका छन् ।
