काठमाडौं । प्रतिनिधिसभाको बैठक आज बस्दै छ ।
बैठक दिउँसो १ बजे बोलाइएको छ ।
संसद सचिवालयले भूमिसम्बन्धीबाहेक पाँच अध्यादेश स्वीकृतिका लागि पेस गर्ने कार्यसूची तयार पारेको छ ।
यसअघि कार्यसूचीमा राखेर पनि फिर्ता लिइएको अध्यादेश आज फेरि कार्यसूचीमा राखिएको हो ।
सत्तारुढ दलहरुबीच भूमिबाहेक पाँच अध्यादेश स्वीकृतिका लागि प्रस्तुत गर्ने सहमति भएअनुसार सरकारले आज संसदमा अध्यादेश पेश गर्ने तयारी गरेको हो ।
प्रतिनिधि सभामा सत्ता पक्षको बहुमत भए पनि राष्ट्रिय सभामा भने सरकारपक्ष निर्णायक देखिदैन ।
राष्ट्रिय सभामा आवश्यक संख्या ३० नपुगेपछि सत्तारूढ कांग्रेस–एमाले अझै दबाबमा छन् ।
जनता समाजवादी पार्टी जसपा नेपाल र लोकतान्त्रिक समाजवादी लोसपाले भूमी सम्बन्धी अध्यादेशमा अडान नछाडेपछि सत्ता पक्षले भूमिसम्बन्धी अध्यादेशमा छलफल गर्दै जाने तर अन्य ५ वटा अध्यादेशलाई भने दुवै सदनमा निर्णयार्थ पेश गर्ने सहमति भएको एमाले प्रमुख सचेतक महेश बर्तौलाले जानकारी दिनुभयो ।
संसद अधिवेशन सुरु भएको एक महिना बितिसक्दा पनि अध्यादेश अघि बढाउने प्रक्रिया रोकिएपछि सरकार दबाबमा परेको थियो ।
यसैबीच, प्रमुख सत्तारूढ दल कांग्रेस र एमालेले आफ्ना सांसदलाई बैठकमा अनिवार्य उपस्थित हुन ह्विप जारी गरेका छन् ।
