काठमाडौं । काठमाडौं महानगरपालिकाका मेयर बालेन साहले नेपाल सरकार भ्रम फैलाउन उद्दत रहेको आरोप लगाएका छन् ।
मेयर साहले सामाजिक सञ्जाल फेसबुकमा ६ बुँदे लामो स्टाटस लेख्दै महानगरमा कार्यकारी अधिकृत टिक्दैनन् भन्ने झुटो भ्रम फैलाएको आरोप लगाएका हुन् ।
उनले सरकारले लगाएको आरोपको रक्षा गर्दै भनेका छन् – “अहिलेसम्म हाम्रो कार्यकालमा चारजना कार्यकारी हटेका छन् ।
चारमध्ये २ लाई हटाउनुको कारण उनीहरु भ्रष्टाचारमा संलग्न रहेको भनेर हो ।
के कार्यकारी टिक्छन् भन्ने देखाउन हामीले भ्रष्टलाई संरक्षण गरिराख्नुपर्ने हो र ? दुई जनालाई सरकारले हटाएको हो, त्यो पनि महानगरलाई जानकारीसमेत नदिएर” ।
संघीय मामिला तथा सामान्य प्रशासनमन्त्री राजकुमार गुप्ताले संघले खटाएका प्रशासकीय अधिकृतलाई महानगरले नै बिदामा राखेका कारण अर्को कर्मचारी खटाउन नसकिएको बताए ।
“मन्त्रालयमा छानबिन प्रतिवेदन आएको छैन । बीचैमा कर्मचारी बोलाउँदा झनै प्रभावित होला भनी प्रतिवेदन पर्खेका हौँ,” मन्त्री गुप्ताले भने, ‘‘मन्त्रालयले महानगरलाई छानबिन प्रतिवेदन पठाइदिन पत्राचार गरेको छ ।’’
संघीय मामिला तथा सामान्य प्रशासन मन्त्रालयले बिहीबार काठमाडौं महानगरपालिकाका प्रशासकीय अधिकृत सरोज गुरागाईंमाथि भएको छानबिन प्रतिवेदन पठाउन पत्राचार गर्यो ।
महानगरबाट छानबिन प्रतिवेदन प्राप्त नभएको र गुरागाईंको पद रिक्त नभई दुईजना प्रमुख प्रशासकीय अधिकृत खटाउन नसकिने भन्दै मन्त्रालयले स्पष्ट पारेको छ ।
बालेनले गएको पुस २४ गते स्थानीय सरकार सञ्चालन ऐन, २०७४ दफा ८४ बमोजिमको कामकाज गर्न प्रमुख प्रशासकीय अधिकृत खटाउन मन्त्रालयलाई पत्र लेखेका थिए ।
तर, आधिकारिक रुपमा गुरागाईंको पद रिक्त नभएको जनाउँदै सरकारले पठाएन ।
सरकारले गैरजिम्मेवारीपन देखाएको बालेनको सचिवालयको दाबी छ । कार्यकारी नपठाए पनि उच्च तहका कर्मचारीलाई आर्थिक अधिकार दिनुपर्ने जिकीर बालेन सचिवालयको छ ।
