काठमाडौं । पूर्वी जिल्लाको सबैभन्दा होचो भूमीबाट संगठन विस्तारमा जुटेको डा. सिके राउत नेतृत्वको जनमतले दिनहुँ दर्जनौ कार्यकर्ता पार्टीमा भित्र्याउदै स्थानीय कमिटी गठनलाई तिब्रता दिएको छ ।
मिसन ८४ अन्तर्गत गाँउ गाँउमा सगठन विस्तार गर्ने योजना अनुरुप जनमत यतिबेला स्थानीय जनताको घरदैलौमा पुगेको हो । दैनिक सयौं कार्यकर्तालाई भित्र्याउदै टोल, वडा र गाँउ कमिटी निर्माणमा जुटेको पार्टीका प्रशासनिक समन्वय विभागका प्रमुख बुद्धिराज न्यौपानेले बताए ।
हिमाल, पहाड र तराईलाई जोड्ने अभियानमा लागेको जनमतले तराईबाट संगठन विस्तार गरेको जनाएको छ । न्यौपानेले झापाको कार्यक्रम जस्तै पहाडी जिल्लामा पनि क्रमिकरुपमा संगठन विस्तारले तिब्रता पाउने बताए । संगठन निर्माणलाई व्यापक बनाउन जनमतले केन्द्रीय नेतालाई नै गाँउमा खटाएको हो ।
युवा र बौद्धिक नेतृत्वलाई प्राथमिकतामा राखेको जनमतमा मधेसमा कार्यरत डाक्टर र इन्जिनियर पढेका व्यक्तिहरूको आकर्षण बढ्दो रहेको न्यौपानेले बताए ।
२०७९ सालको निर्वाचनबाट नयाँ शक्तिका रुपमा उदाएको डा. राउतको पार्टीले आगामी निर्वाचनमा समानुपातिक तर्फको भोट नै २० लाख कटाउने योजना बनाएको छ ।
