काठमाडौं । नेकपा एकीकृत समाजवादीले सरकारविरुद्ध योजनाबद्ध रुपमा आन्दोलनमा उत्रिने तयारी गरेको छ । पार्टीले आन्दोलनको तयारी गर्न महासचिव घनश्याम भुसालको नेतृत्वमा समिति गठन गरेको छ ।
पार्टी कार्यालय आलोकनगरमा आज बसेको पोलिटब्युरो बैठकमा अध्यक्ष माधव नेपालले पेस गरेको राजनीतिक प्रतिवेदनमा समितिले आन्दोलनको कार्ययोजना बनाउने र हामी योजनाबद्ध ढङ्गले आन्दोलनमा उत्रिने तयारी गरेको हो ।
त्यस्तै प्रतिवेदनमा पार्टीले नेतृत्व गरेको स्थानीय सरकार समाजवादका आधार निर्माण गर्ने गरी जनताको पक्षमा काम गरेर नमूना प्रस्तुत गर्नुपर्ने उल्लेख छ । प्रतिवेदनमा भनिएको छ, ‘हामी निर्वाचित नभएका स्थानीय तहका हाम्रा पार्टी कमिटीहरूले सम्बन्धित स्थानीय तहको छायाँ सरकारका रूपमा काम गर्नु पर्दछ ।’
पार्टीभित्र अनुशासनहीन र अराजक प्रवृती देखिएको भन्दै पार्टीको निर्णयको उपहास गर्दै जथाभावी बोल्ने, लेख्ने प्रवृत्ति देखिएको उल्लेख छ ।
पार्टीमा जिम्मेवारी लिने तर त्यसलाई पूरा नगर्ने प्रवृत्ति बढेर गएको अध्यक्ष नेपालले औल्याएका छन् ।
