काठमाडौं । प्रधानमन्त्री केपी शर्मा ओलीले आज कमलादीस्थित स्काइ वाक टावरको भ्रमण र अवलोकन गरेका छन् । सार्वजनिक बिदाको अवसर पारेर पत्नी राधिका शाक्यसहित प्रधानमन्त्री ओली स्काइ वाक टावर चढ्न गएका हुन् । 

 टावरले हरेक महिना पर्यटकका रुपमा अतिविशिष्ट र विशिष्ट व्यक्तिहरुलाई आमन्त्रण गर्दै आएको छ । सोही क्रममा टावरले आज प्रधानमन्त्री ओलीलाई घुम्न निम्तो गरेको हो । त्यहाँ पुगेर ओलीले टावरको उचाइमा राष्ट्रिय झण्डोत्तलन गरेका छन् । 

ओलीले टावरहरुको उपयोगिता छैन भन्नेहरुलाई यो टावरले गतिलो खण्डन गरेको प्रतिक्रिया दिए ।

उनले यस्ता टावरमा ज्येष्ठ नागरिक र बालबालिकासहित पर्यटकहरुलाई फुर्सदको समयमा घुमफिर, दृश्यावलोकन र मनोरञ्जनका लागि उपयोगी सावित हुने बताए । 

काठमाडौँको मध्यभागमा रहेको दुई सय ५६ फिट उचाइको सो टावर निजी क्षेत्रको लगानीमा सञ्चालनमा छ ।