काठमाडौं । युक्रेन युद्ध अन्त्यका लागि भन्दै साउदी अरेबियामा भएको अमेरिका र रुसका उच्च अधिकारीहरुबीचको उच्चस्तरीय वार्तामा महत्वपूर्ण समझदारीहरु भएको छ ।
अमेरिका र रुसले युक्रेन युद्ध अन्त्यका लागि वार्ता टोली गठन गर्न सहमत हुँदै विभिन्न तीन बुँदाहरुमा सहमति भएको रसियाका विदेशमन्त्री सर्गेई लाभरोभले जानकारी दिए ।
उनका अनुसार एकअर्काका देशहरूमा यथाशक्य छिटो राजदूत नियुक्त गर्ने, कूटनीतिक मिशनहरूमा रहेका अवरोध हटाउने, जसमध्ये बैंक हस्तान्तरणमा रहेका प्रतिबन्धहरू हटाउनेलगायत समझदारी भएका छन्।
त्यस्तै, युक्रेनी विवाद समाधानको प्रक्रिया अघि बढाउन वार्ता टोली बनाउने, जहाँ अमेरिकाले आफ्नो प्रतिनिधि नियुक्त गरेपछि रुसले पनि गर्ने लाभरोभले बताए ।
त्यस्तै, तेस्रो बुँदामा अमेरिकाले पूर्ण रूपमा सहकार्य पुनः सञ्चालन गर्न अनुकूल वातावरण बनाउने र विभिन्न क्षेत्रमा सहकार्य विस्तार गर्ने उल्लेख गरेका छन्।
त्यस्तै, अमेरिकी विदेशमन्त्री मार्को रुबियोले कठिन कूटनीतिक प्रक्रियामार्फत मात्रै यस्ता वार्ताहरु सम्भव हुने बताए।
रुबियोका अनुसार आजको बैठकको मुख्य उद्देश्य राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच गत हप्ता भएको टेलिफोन वार्तापछि संवादको मार्ग खुला राख्नु रहेको र त्यसमा सफलता मिलेको छ ।
रुस र अमेरिकाले वार्तामा आगामी दिनमा युरोप र युक्रेनलाई पनि सहभागी गराउने तयारी भएको अन्र्तराष्ट्रिय सञ्चारमाध्यहरुले जनाएका छन् ।
युक्रेनका राष्ट्रपति भोलोडिमिर जेलेन्स्कीले रुससँगको युद्ध अन्त्य गर्नका लागि युक्रेन र युरोपलाई ‘निष्पक्ष’ वार्ता गर्ने बताएका छन्।
