काठमाडौं । सिके राउत नेतृत्वको जनमत पार्टीले झापाबाट मिसन ८४ अभियान सुरु गरेको छ । अभियान अन्तर्गत जनमतले मुलुककै सबैभन्दा होचो स्थान झापाको कचनकबलबाट कार्यकर्ता विस्तार अभियान थालेको हो ।
पार्टीका प्रशासन विभाग प्रमुख बुद्धिराज न्यौपानेले अभियानका क्रममा अन्य दल छोडेर आएकालाई जनमतमा स्वागत गरेका हुन् ।
उनले सो स्थानबाट दर्जनौं व्यक्ति जनमतमा प्रवेश गरेको जानकारी दिए । उनका अनुसार जनमत प्रवेश गर्ने अधिकांस नेकपा एमाले परित्याग गरि जनमत आएका हुन् । पूर्वबाट सुरु गरिएको अभियान देशै भरी सञ्चालन हुने न्यौपानेले बताए ।
जनमतले आगामी निर्वाचनमा समानुपातिक मत २० लाख पुर्याएर मधेसको पहिलो शक्ति बन्ने लक्ष्य अनुरुप अभियान सुरु गरेको नेता न्यौपानेको भनाई छ । अभियानमा केन्द्रबाट गएका विभागका सदस्य मनिराम रेग्मी सहितको टोली सहभागी छ ।
२०७९ को प्रतिनिधिसभा तथा प्रदेश सभाको निर्वाचनबाट मधेस प्रदेशको नयाँ शक्तिका रूपमा उदाएको राउत नेतृत्वको जनमत पार्टी आफ्नो आधार क्षेत्र मधेसमा जनमत बढाउन आक्रामक अभियानमा जुटेको हो ।
०७९ को निर्वाचनमा प्रतिनिधिसभामा ६, प्रदेश सभामा मधेस प्रदेशका १३ र लुम्बिनीका तीन गरेर १६ सिट जितेको जनमतले ०८४ को निर्वाचनमा कम्तीमा २० लाख समानुपातिक मत ल्याउने लक्ष्य लिएको छ ।
२०७९ को निर्वाचनमा प्रतिनिधिसभातर्फ तीन लाख ९४ हजार पाँच सय १६ समानुपातिक मत ल्याएर राष्ट्रिय दल बनेको जनमतले त्यसलाई पाँच गुणा बढाउने गरी संगठन विस्तारमा जुटेको न्यौपानेले बताए ।
