काठमाडौं । नेकपा एकीकृत समाजवादी पार्टीको भ्रातृसंगठन अनेरास्ववियूको विवादका कारण पार्टी नै फुट्न सक्ने चेतावनी नेताहरुले दिएका छन् ।
सम्मानीत नेता झलनाथ खनालले अनेरास्ववियूको विवाद समाधान नभए अलग ढंगले अघि बढ्न सकिने बताएका हुन् ।
अनेरास्ववियू असन्तुष्ट पक्षले सोमबार काठमाडौंमा आयोजना गरको भेलामा खनालले अनेरास्ववियूको विवाद समाधानका लागि पार्टीको बैठकमा छलफल गर्ने भन्दै निष्कर्ष निस्कन नसके अलग ढंगले अघि बढ्न सकिने चेतावनी दिए ।
असन्तुष्ट पक्षले व्यानर राखेर भेला आयोजना गरेपछि खनालले तत्कालका लागि व्यानर हटाउन आग्रह गरेका थिए ।
खनालले छुट्टै भेला नभइ छलफल कार्यक्रम मात्र गर्न सुझाव दिएका थिए । खनालले केन्द्रीय कमिटी बैठकसम्म पर्खन आग्रह गर्दै तत्काल समानान्तर कमिटी गठन नगर्न सुझाव दिए ।
अनेरास्ववियूकी यसअघिका अध्यक्ष आरती लामाले व्यानरमा नयाँ समानान्तर कमिटी घोषणा भनिएपनि शीर्ष नेताको आग्रहमा जिम्मेवार भएर कार्यकर्ता भेलामा रुपान्तरण गरिएको बताइन्।
लामाले आफूहरुलाई कारवाही गर्दैमा निराश नहुने भन्दै आवश्यक परे विद्रोह गर्ने चेतावनी दिइन् । पार्टी अध्यक्ष माधवकुमार नेपालले अपानि जारी गरी आरती लामालाई अनेरास्ववियूको अध्यक्षबाट हटाएपछि संगठनमा विवाद चुलिएको हो ।
