काठमाडौं । चलचित्र निर्माता तथा निर्देशक रिमेश अधिकारीले नेपाली चलचित्र ‘योगमाया’ निर्माण गर्ने घोषणा गरेका छन् । 

वसन्त पञ्चमीको साइत पारेर अधिकारीले योगमायाको स्किृप्ट पुजा गर्दै चलचित्र निर्माण गर्ने घोषणा गरेका हुन् । आफ्नो जन्मदिन समेतको अवसरमा सरस्वती पूजाको दिन पशुपतिनाथ पुगेर उनले स्किृप्ट पुजा गरेका हुन् ।

यसअघि ऐतिहासिक सिनेमा नालापानी निर्माण गरेका निर्देशक अधिकारीले आफ्नो नयाँ प्रोजेक्टको कथावस्तु पनि ऐतिहासिक नै रोजेका छन् ।  

योगमाया नेपाली इतिहासमा एक विद्रोही महिलाको छवी बनाएकी समाज परिवर्तनको संवाहक पनि हुन् । तत्कालिन सामाजिक परिवेशविरुद्ध योगमायाले विद्रोह गरेकी थिइन् । उनै योगमायाको कथामा निर्देशक अधिकारीले सिनेमा बनाउने बताएका छन् ।  

समाजका सबै विकृति अन्त्य हुनुपर्ने विषयमा लडेकी साहसिक महिला योद्धाले देखेको नयाँ समाजलाई चलचित्रले न्याय गर्ने अधिकारीको विश्वास छ ।  

उनले योगमायाको विषयमा एक वर्षको अनुसन्धानपछि स्किृप्ट तयार पारेको बताए । 

स्कृप्ट तयार भएपनि अन्य टिमको चयन प्रक्रिया भने सुरु भएको छैन ।  कलाकार तथा प्राविधिकहरूको चयन चाँडै सुरु गर्ने अधिकारीले बताए । यसैबीच उनले योगमायाको एउटा गीत राजेश पायल राईको स्वरमा रेकर्ड  गराइसकेको जनाएका छन् ।