२० माघ, २०८१
झापा, भौतिक पूर्वाधार तथा यातायात मन्त्री देवेन्द्र दाहालले राष्ट्रिय गौरवका आयोजनाहरुमा श्रोत अभाव हुन नदिने दृढता व्यक्त गर्नु भएको छ । राज्यलेनै प्रमुख महत्व दिएका गौरवका आयोजनाहरु श्रोत अभाव भई अवरुद्ध हुने स्थिति आउन नदिन सरकार दृढतापूर्वक लागेको उहाँको भनाई छ । 

हुलाकी राजमार्ग अन्तर्गत झापा र मोरङ् जोड्ने रतुवा खोला र झापाकै कन्काई नदीमा निर्माणाधिन पुलको आईतबार अनुगमन पछि राज्यले श्रोत अभाव हुन नदिने आयोजना र योजनाहरुको ढिला सुस्ती मान्य नहुने बताउनुभयो । ‘कुनै पनि आयोजना अवरुद्ध हुनुहुँदैन, रोकिनु हुँदैन’ सडक विभागका अधिकारीहरुलाई निर्देशन दिँदै मन्त्री दाहालले भन्नुभयो, ‘अझ राज्यले खास महत्व दिएका आयोजनाहरु त तोकिएकै समयमा बन्नु पर्छ, अब पनि ढिलासुस्ती हुने हो भने राम्रो मानिदैन ।’

नीतिगत तथा कानूनी समस्याले जटिलता निम्त्याए सरकारले सहजीकरण गरि दिने भन्दै उहाँले ढिलासुस्ती गर्ने, गुणस्तरहीन काम गर्ने र विकास निर्माणलाई अवरुद्ध पार्ने प्रवृति अन्त्य गरिने समेत बताउनुभयो ।

रतुवाको पुलको मुख्य संरचना निर्माण भई माटो भर्ने कार्य भई रहेको छ । यस्तै कन्काईको पुल लामो समय अवरुद्ध भई हालै मात्र निर्माण कम्पनीले काम शुरु गरेको जनाएको छ । राष्ट्रिय महत्व र गौरवको हुलाकी राजमार्गमा कालोपत्रे भई सकेका स्थानमा समेत पुलका कारण यातायात सहज हुन नसकेको उल्लेख गर्दै उहाँले अझै ढिला सुस्ती गर्ने हो भने सरकार हेरेर मात्र नबस्ने चेतावनी पनि दिनुभयो । 

मन्त्री दाहालले आईतबारनै दमक नगर भित्रका विभिन्न योजनाहरुको पनि अनुगमन गर्नुभयो । प्रदेश सभा सदस्य होमबहादुर थापा, नेकपा एमाले झापाका अध्यक्ष प्रेम गिरी लगायत सहभागी हुनुहुन्थ्यो ।