काठमाडौं । भौतिक पूर्वाधार तथा यातायात मन्त्री देवेन्द्र दाहालले सरकार ढल्छ भनेर धेरै पीर नगर्न सुझाव दिएका छन् । उनले सत्ता साझेदारहरुबीच दर्विलो साथ र विश्वास रहेकोले सरकारको भविष्यमा धेरै पीर नलिन विपक्षीहरु लाई सूझाव दिएका हुन् ।
संसदभित्रको अंक गणित बुझेर मात्र सरकारको जोखाना हेर्नुपर्ने उनको भनाइ छ ।
विभिन्न कार्यक्रममा सहभागी हुन गृहजिल्ला झापा पुगेका मन्त्री दाहालले बिर्तामोडमा जिल्लाका जनप्रतिनिधिहरु, प्रदेश सांसद, मन्त्री र जिल्लाका पार्टी नेताहरुसँगको भेटघाटमा उनले सरकारको स्थायीत्वमा शंका नगर्न आग्रह गरेका हुन् । देश आधुनिक सुरुङ युगमा प्रवेश गरेको बताउदै उहाँले यो सरकार बनेपछि के कति काम भन्ने बारे बुझ्नलाई फिल्डमा जानुपर्ने बताए।
अवरुद्ध योजनाहरु गति दिएको बताउँदै मन्त्री दाहालले विकासमा अवरोध हुने कानुन वा नियम संशोधन गर्दै जाने धारणा व्यक्त गरे ।
समृद्ध नेपाल, सुखी नेपालीको जग दर्विलो बनाउदै सरकारले विकास निर्माणको कामलाई गति दिने सरकारको प्रमुख दायित्व भएको बताए ।
मन्त्री दाहालका अनुसार आगामी बजेटमा योजनाहरु पहुँचका आधारमा नभई आवश्यकताका आधारमा छनौट गरिनेछ । जनप्रतिनिधिहरुलाई पनि सोही प्रकृतिका योजना सिफारिस गर्न सूझाव दिए ।
नागरिकको जीवनमा रुपान्तरण ल्याउने किसिमका योजनालाई प्राथमिकता दिन आग्रह गर्दै मन्त्री दाहालले आधारभुत आवश्यकलाई नभूल्न आग्रह गरे । मन्त्री दाहालले कृषि उपजको बजारिकरण हुने र उत्पादन वृद्धि गर्ने योजना आवश्यक भएको धारणा राखे ।
