काठमाडौं । जनता समाजवादी पार्टी (जसपा) नेपालले केन्द्रीय कार्यकारिणी समितिको बैठक बोलाएको छ ।
आजदेखि सुरु हुने बैठक पार्टीको केन्द्रीय कार्यालय बालकुमारीमा बिहान ११ बजे बस्ने छ । दुई दिनसम्म चल्ने बैठकमा जनतासँग जसपा नेपाल, आधारभूत संगठन निर्माण अभियानको समीक्षा, वर्तमान राजनीतिक परिस्थिति र पार्टीको संगठनात्मक कार्ययोजनालगायत एजेण्डामा छलफल हुने बताइएको छ ।
पार्टीका पदाधिकारी तथा सदस्यहरुलाई आ–आफ्नो जिम्मेवारी र कार्यक्षेत्रअन्तर्गत भए गरेका कार्य प्रगति विवरणको लिखित प्रतिवेदनसहित बैठकमा अनिवार्य उपस्थित हुन भनिएको छ ।
जसपा नेपाल अहिले सत्ताबाहिर भएपनि अर्को प्रतिपक्षी दल माओवादीसँग भने उसको सम्बन्ध पछिल्लो समय सुमधुर देखिदैन । जसपा नेपालले आफ्नो पार्टी विभाजनको दोष प्रचण्डलाई दिँदै आएको छ ।
प्रचण्डकै कारण उपेन्द्र नेतृत्वको जसपा नेपालले समाजवादी मोर्चा पनि त्यागिसकेको छ । माओवादी अध्यक्ष पुष्पकमल दाहाल प्रचण्डसँग सम्बन्ध सुमधुर नभएकै कारण जसपा नेपाल सरकारबाहिर भए पनि विपक्षी मोर्चामा सामेल हुन सकेको छैन ।
अन्य विपक्षी दल एक भएर सरकारको विरोधमा लागिरहेका बेला उपेन्द्र नेतृत्वको पार्टीले अब के कस्तो कार्यदिशा लेला भन्नेमा आमराजनीतिक वृत्तमा चासो बढेको छ ।
