काठमाडौं । महाकुम्भ मेलाका क्रममा भागदौड मच्चिदा कम्तीमा १४ जनाको मृत्यु भएको छ । दर्जनौं घाइते भएका छन् । गएराति १ बजेतिरप्रयागराजको संगम किनारमा भागदौड मच्चिँदा दर्जनौं व्यक्ति हताहत भएको आशंका गरिएको छ ।

भारतीय सञ्चारमाध्यमका अनुसार १४ वटा शव पोस्टमार्टमका लागि पुर्याइएको छ भने अन्य मृतक र घाइतेको संख्या अझ बढ्न सक्ने अनुमान गरिएको छ । 

भागदौड मच्चिएपछि प्रशासनले अमृत स्नानको कार्यक्रम स्थगन गराएको छ । संगम नाकामा अत्यधिक भीड भएकाले तत्कालका लागि स्नान कार्य रोक्नु परेको प्रशासनको तर्क छ ।

अचानक होहल्ला मच्चिएपछि दर्शनार्थीहरु भागाभाग गर्ने क्रममा भिडले मानिसहरुलाई कुल्चिएको थियो । 
 केही महिलाहरू भुइँमा लडे र मानिसहरू तिनीहरूलाई कुल्ची हिँडे।

दुर्घटनापछि ७० भन्दा बढी एम्बुलेन्सहरू संगम किनारमा पुगेका थिए। यसै मार्फत घाइते र मृतकहरूलाई अस्पताल लगियो।

अहिले संगम नाका क्षेत्रमा सर्वसाधारणको प्रवेश निषेध गरिएको छ। भीड बढ्न नदिन प्रयागराज शहरसँग सिमानामा रहेका सबै जिल्लाहरूमा भक्तजनहरूको प्रवेशमा रोक लगाइएको छ ।