काठमाडौं । प्रधानमन्त्री केपी शर्मा ओलीको स्वास्थ्यमा सुधार भएको छ । केही दिन यता स्वास्थ्यका कारण सार्वजनिक कार्यक्रम स्थगित गरेका प्रधानमन्त्री ओलीले आजदेखि सहभागिता जनाउने भएका हुन् । स्वास्थ्यमा सुधार आएसँगै ओलीले आज एकै दिन तीनवटा कार्यक्रममा सहभागिता जनाउने उनको सचिवालयले जनाएको छ ।
सचिवालयका अनुसार बिहान साढे १० बजे सम्पत्ति शुद्धीकरण निवारण राष्ट्रिय दिवसको अवसरमा नेपाल प्रशासनिक प्रशिक्षण ललितपुरमा आयोजित कार्यक्रममा उनी सहभागी हुने छन् ।
त्यस्तै ओली दिउँसो १ बजे उनी भक्तपुरको कटुन्जेस्थित सूर्यविनायक नगरपालिकाको प्रशासकीय भवन उदघाटन कार्यक्रममा सहभागी हुने छन् ।
त्यसपछि साँझ ५ बजे प्रधानमन्त्रीको सरकारी निवास बालुवाटारमा सत्ता गठबन्धनको बैठकमा सहभागी हुने कार्यक्रम रहेको सचिवालयले जारी गरेको सूचनामा उल्लेख छ ।
यसअघि ओली अस्वस्थ्य भएपछि बुटवल–पाल्पा सडकखण्डको सिद्धबाबा सुरुङमार्ग छिचोल्ने र पूर्वपश्चिम राजमार्ग अन्तर्गत बुटवल–गोरुसिंगे खण्ड स्तरोन्नतीको शिलान्यास कार्यक्रममा अनुपस्थित भएका थिए । दुवै कार्यक्रममा ओलीले भर्चुअल सहभागिता जनाएका थिए । यद्यपी चिकित्सकले उनलाई धेरै दौडधुप नगर्न र आराम गर्न सल्लाह दिएका छन् ।
