काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड तेह्रथुम भ्रमणमा जाँदैछन् । पछिल्लो समय जिल्ला दौडाहमा रहेका प्रचण्ड आज पूर्वी पहाडी जिल्ला तेह्रथुम जान लागेका हुन् ।
उपमहासचिव वर्षमानसहितको टोली लिएर प्रचण्ड सेनाको हेलिकोप्टर मार्फत तेह्रथुम पुग्ने माओवादीका नेता रघु गौतमले जानकारी दिए ।
पूर्वी जिल्लाका विभिन्न स्थानमा पुगेर कार्यकर्ताको मनोबल बढाउदै अएका प्रचण्डले त्यहा दुई दिन बिताउने नेता गौतमले बताए ।
तेह्रथुम, एमाले अध्यक्ष एवं प्रधानमन्त्री केपी शर्मा ओलीको जन्म स्थान पनि हो । माओवादी केन्द्रले ओलीको जन्मथलो आठराईमा विभिन्न कार्यक्रमको आयोजना गरेको छ ।
माओवादी नेताका अनुसार प्रचण्ड आज र भोलि दुई दिन तेह्रथुमका विभिन्न स्थानमा आयोजित कार्यक्रममा सहभागी हुने छन् ।
प्रचण्डले आज लालीगुराँस नगरपालिका–७ लसुनेस्थित शहीद धनरुपा पार्कको उद्घाटन गर्नेछन् । त्यहाँबाट उनी एमाले अध्यक्ष केपी शर्मा ओलीको जन्मथलो आठराई जानेछन् ।
प्रचण्डले आठराई गाउँपालिका–३ ह्वाकु बगाले शहीद स्मृति पार्क र सोही स्थानमा जनयुद्ध तथा शान्ति संग्रहालय भवनको पनि शिलान्यास गर्ने छन् ।
प्रचण्डले आजै आठराई–२ स्थित पर्यटकीय क्षेत्र झाँक्री गुफा पार्कको अवलोकन गर्ने कार्यतालिका छ ।
उनी आज राति आठराई–६ चुहानडाँडा बजारमा बास बस्नेछन् । मंगलबार बिहान आठराई–६ मा पार्टी कार्यकर्ता, स्थानीय तथा स्वर्गीय माओवादी नेता भक्तराज कन्दङवाका परिवारसँग भेटघाट गर्ने प्रचण्डको कार्यतालिका छ । त्यसपछि उनले कन्दङवाको शालीक अनावरण गर्ने नेता गौतमले बताए । अध्यक्षलाई तेह्रथुम लैजान माओवादी केन्द्रका केही नेता यसअघि नै जिल्लामा खटिएका थिए ।
उनको कार्यतालिका यस्तो छ :
