काठमाडौं । बलात्कारको आरोप लागेका नेकपा एमालेका केन्द्रीय सदस्य ऐन महरमाथि प्रहरीले अनुसन्धान अघि बढाउनुपर्ने भएको छ । 

बुधबार उच्च अदालत पाटनले महरमाथि बलात्कार मुद्दामा अनुसन्धान अघि बढाउन प्रहरीलाई आदेश दिएको हो । 

महरबाट बलात्कृत भएको भन्दै एक महिलाले दिएको जाहेरी तामेलीमा राखिएपछि पीडित अदालत पुगेकी थिइन् । 

सत्ताको आडमा महरले प्रहरी लगाएर थुनाउने,मानसिक तनाव दिने क्रम झन् तीब्र पारेपछि पीडित महिलाले अदालत परिसरमै विष सेवनको प्रयाससमेत गरेकी थिइन् । 

जिल्ला सरकारी वकिल कार्यालय काठमाडौँ र जिल्ला प्रहरी परिसर काठमाडौँ समेतलाई विपक्षी बनाएर दायर मुद्दामा न्यायाधीशद्वय ब्रजेश प्याकुरेल र कृष्णराम कोइरालाले अनुसन्धान अघि बढाउन आदेश दिएका हुन् । 

अदालतले अनुसन्धान प्रक्रिया अघि बढाउ आदेश दिएको हो । अदालतको आदेशसँगै प्रहरीले महरलाई पक्राउ गरेर अनुसन्धान अघि बढाउनुपर्ने हुन्छ ।

 यसअघि उनीविरुद्ध मुद्दा नचलाउने सरकारी वकिलको निर्णयविरुद्ध पीडित महिलाले दर्ता गरेको मुद्दामा उच्च अदालत पाटनले अनुसन्धान अघि बढाउन रिट जारी गरेको हो । 

महरको मुद्दामा अदालतले जाहेरी दरखास्त दर्ता गर्न आदेश दिएसँगै एमालेका अर्का  प्रभावशाली भनिएका नेता जोडिएको यस्तै प्रकृतिको मुद्दाले पनि न्यायिक बाटो लिने सम्भावना बढेको छ ।