-1737516550.jpg)
काठमाडौं । सत्ताको तागत कति हुन्छ भन्ने कुरा हेर्न धेरै पर पुग्नु पर्दैन । झापाको विर्तामोड नगरपालिकाका पूर्व मेयर ध्रुवकुमार सिवाकोटी एमाले नेता भएकै कारण नाबालिक बालिका बलात्कार जस्तो गम्भीर अपराध गरेर पनि प्रहरी हिरासतमा बसेका छैनन् ।
सत्ता र राजनीतिको आडमा उनी डेढ महिनादेखि स्थानीय बी एण्ड सी अस्पतालको भीआइपी क्याबिनमा उपचारको बहानमा हिरासत छलिरहेका छन् ।
उनको निगरानीका लागि प्रशासनले चारजना प्रहरीलाई समेत खटाउनु परेको छ । अनुसन्धानका क्रममा प्रहरीले पक्राउ गरेयता एक दिन पनि हिरासतमा बसेका छैनन्। गत मंसिर २४ गते पक्राउ परेको दिनदेखि नै उनी अस्पतालमा आराम गरिरहेका छन् ।
अदालतले पुर्पक्षको लागि थुनामा पठाए पनि उनी भने अस्पतालको भीआईपी कक्षमै बसेर आफन्त र कार्यकर्तासँग गफ गरेर दिन बिताइरहेका छन् ।
आफ्नै घरमा काम गर्ने किशोरीलाई बलात्कार गरेको आरोपमा उनलाई अदालतले थुनामा राखेर अनुसन्धान गर्न आदेश दिइसकेको छ । बालिका अहिले १७ वर्षकी भएकी छन् । गत पुस २२ गते जिल्ला अदालत झापाले उनलाई पुर्पक्षका लागि झापा कारागार चलान गरेको थियो ।
आफु प्रेसर र सुगरको विरामी भएको भन्दै अदालतसामु अनुनय गरेपछि उपचारको सुविधालाई सिवाकोटीले दुरुपयोग गरेको पीडितका आफन्तको आरोप छ ।
‘राजनीतिक पहुँच र शक्तिको आड’मा हिरासत र कारागार नगई अस्पतालमै बसेको पीडित पक्षको गुनासो छ ।
सिवाकोटीको अस्पताल बसाइबारे कोशी प्रदेशसभा बैठकमा पनि प्रश्न उठेको छ । झापाकी सांसद सविना बजगाईंले अदालतको आदेशमा कारागार पठाइएका व्यक्तिलाई राजनीतिक पहुँचको आधारमा अस्पतालमै राखिएको भन्दै आपत्ती जनाएकी थिइन्। आमा बुबा नभएकी बालिकालाई मेयर भएका बखत सिवाकोटीले आफ्नै घरमा राखेर पढाउने भन्दै जिम्मा लिएका थिए ।
बालिकाले सिवाकोटीलाई बुवा भनेर बोलाउने गरेकी थिइन्। तर, बालिकालाई सिवाकोटीले पटक–पटक बलात्कार गरेको पीडितको जाहेरीमा उल्लेख छ । कक्षा ६ मा पढ्दादेखि नै ६८ वर्षिय सिवाकोटीले बलात्कार गरेको पीडितले बयान दिएकी छन् ।
सिवाकोटीकी श्रीमती विदेश गएको बेला बलात्कार गरेको र कसैलाई सुनाएमा घरबाट निकालिदिने धम्की दिएको पीडितको भनाइ छ ।
स्कूलमा फी तिर्न र कापीकिताब किन्न पैसा माग्दा पनि सेक्स गर अनि मात्रै दिन्छु भनेपछि आफू बाध्य भएको पीडितले बताएकी छन् । सिवाकोटीले पोर्न भिडियो देखाएर आफूमाथि बलात्कार गरेको बालिकाले बयानमा भनेकी छन् ।
पटक–पटक बलात्कारमा परेपछि मानसिक तनावमा परेकी बालिका गत मंंसिर २४ गते बिहान सिवाकोटीको घर छोडेर भारत जान हिँडेकी थिइन् ।
ठुलीआमा भारतको आसममा बस्ने भएकोले उतै जाने सोच बनाएर हिँडेकी उनलाई काँकडभिट्टाबाट एक संस्थाले उद्धार गरेको थियो । त्यसपछिको सोधखोजीमा मात्र बालिका सिवाकोटीबाट पीडित भएको खुलेको थियो ।
संस्थाकै सहयोगमा पीडितले जाहेरी दिएपछि सिवाकोटी पक्राउ परेका थिए ।
शिवाकोटी २०७४ सालको निर्वाचनमा नेकपा एमालेबाट बिर्तामोडको मेयरमा निर्वाचित भएका थिए। उनी मेयरमा निर्वाचित भएको एक महिना पनि नपुग्दै बालिकाको पालन पोषण गर्ने र पढ्ने व्यवस्था पनि मिलाइदिने शर्तमा घरमा राखेका थिए। बालिका उनकै घरमा बसेर काम गर्दै पढिरहेकी थिइन्। हाल उनी ल्याव टेक्निसियन पढिरहेकी थिइन्।
तर आफू कक्षा ८ मा पढ्दादेखि नै मेयर शिवाकोटीले पटक पटक बलात्कार गरेको आरोप पीडितको छ। श्रीमती घरबाहिर गएको बेला आफूलाई बलात्कार गर्ने गरेको आरोप पीडित बालिकाको छ।
शिवाकोटीले भने बालिकालाई छोरी मानेर सोही अनुसार व्यवहार गरेको दाबी गर्दै अदालतमा बयान दिएका छन्।
