काठमाडौं । सत्ता सहयात्री मुख्य दल एमाले र कांग्रेसको सम्बन्ध चिसिन थालेको छ । दुई दलको सम्बन्ध कर्णालीबाट चिसिन थालेको हो ।

झण्डै चार महिनापछि पहिलो पटक बसेको प्रदेशसभाको बैठकमा दुई दलबीचको सम्बन्ध छताछुल्ल भएको हो । पहिलो पटक कर्णाली सरकारको नेतृत्व गर्ने मौका पाएको एमालेले आफ्नै सहयात्री कांग्रेसबाट भने सुखद साथ पाउन नसकेको हो । दुई बीचको असमझदारी सदनमा छरपस्ट भएर पोखियो । 

नेपाली कांग्रेसका संसदीय दलका नेता जीवनबहादुर शाहीले सरकारको कार्यशैलीप्रति व्यापक असन्तुष्टि मात्र जनाएनन् सरकारबाट बाहिरिन सक्नेसम्मको चेतावनी दिए ।

भर्खरै विशेष अदालतबाट वाइडबडी जहाज खरिद प्रकरणमा सफाई पाए लगत्तै सुर्खेत पुगेका शाहीले सरकारको कार्यशैली प्रति कडा आक्रोश व्यक्त गर्दै सरकार छाड्नेसम्मको चेतावनी दिएका हुन् ।

जहाज खरिद प्रकरणमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेपछि शाही प्रदेशसभा सदस्यबाट निलम्बित भएका थिए । उिनको निलम्बन फुकुवा भएसँगै संसदमा उपस्थित भएका शाहीले बैठकमा आक्रोशपूर्ण सम्वोधन गरेका थिए ।

सम्वोधनका क्रममा शाहीले भौतिक पूर्वाधार तथा शहरी विकास मन्त्री शेरबहादुर बुढालाई बर्खास्त गर्न माग समेत गरे । आफूले पटक पटक फोन गर्दा पनि मन्त्री बुढाले नउठाएको उनको भनाइ छ ।

पूर्वमुख्यमन्त्री समेत रहेका शाहीले दुई दिनको समयावधि दिँदै तत्काल विकास निर्माणका योजनामा भौतिक मन्त्रालयले सूचना ननिकालेको खण्डमा सरकारबारे पुनर्विचार गर्ने चेतावनी दिए ।

भौतिक मन्त्री बुढाले राजिनामा नदिए एमालेसँग सहयात्रा हुननसक्ने समेत उनले बताए ।

प्रतिपक्षी दल माओवादी केन्द्रले पनि कर्णालीमा सरकार निदाएको भन्दै सरकारको आलोचना गरेको छ । पूर्वमुख्यमन्त्री एवं नेकपा माओवादी केन्द्र संसदीय दलका नेता राजकुमार शर्माले सरकार सुतेको जस्तो महसुस भएको बताए । ‘

कर्णालीमा कांग्रेसका तर्फबाट चार जना मन्त्री सरकारमा सहभागी छन् ।