
काठमाडौं । अमेरिकामा शनिबार रातिदेखि टिकटक बन्द भएको छ । पूर्व घोषित समय भन्दा दुई घण्टा अगावै लोकप्रिय एप्स टिकटक बन्दभएपछि त्यहा रहेका नेपाली समुदायमा एक किसिमको तनाव उत्पन्न भएको देखिन्छ ।
टिकटक बन्द हुने समय नजिकिदै गर्दा अमेरिकामा रहेका नेपालीहरुले भावुक सन्देश सहितका भिडियोहरु पोस्ट गरेका छन् ।
टिकटक प्रति नेपाली समुदायको क्रेजलाई उनीहरुले पोस्ट गरेका भिडियोले पुष्टि गरेको छ । नेपाली समाज यतिबेला टिकटक बन्द भएकोमा निराश देखिन्छ ।
कतिपयले भने रुदै भिडियो पोस्ट गरेका छन् । यसले के देखाउछ भने फुर्सदको समयमा नेपालीले टिकटकलाई मनोरन्जन र सूचना आदानप्रदानका लागि अधिकतम प्रयोग गर्दै आएका थिए जुन अब उनीहरुले उपयोग गर्न पाउने छैनन् ।
अमेरिकामा अहिले एप्लीकेशन खोल्दा टिकटक अहिले उपलब्ध नभएको र अमेरिकामा टिकटकलाई प्रतिबन्ध लगाउने कानुन बनाइएकाले टिकटक प्रयोग गर्न नसक्ने सन्देश आउन थालेको छ ।
यसैबीच, राष्ट्रपति ट्रम्पले पदभार सम्हालेपछि टिकटक पुनस्थापनाका लागि समाधान निकाल्न संकेत गरेकाले कतिपयले टिकटक चल्ने आशा जनाएका छन् ।
सर्वोच्च अदालतले शुक्रबार अमेरिकामा टिकटकलाई प्रतिबन्ध लगाउने कानुन रोक्न अस्वीकार गरेपछि आइतबारदेखि अमेरिकामा टिकटक बन्द भएको हो ।
नवनिर्वाचित राष्ट्रपति डोनाल्ड ट्रम्पले टिकटकप्रति समर्थन जनाइरहेको बेलामा टिकटक बन्द भएको छ । ट्रम्पले टिकटकलाई ९० दिनको समयसिमा दिने संकेत गरेका छन् । त्यसो भएमा बन्द भएको टिकटक ट्रम्पले पदभार ग्रहण गरेपछि खुल्ने कतिपयको विश्वास छ ।
१ सय ७० मिलियन भन्दा बढी अमेरिकीहरूले टिकटकलाई मनोरञ्जन र सूचनाका लागि प्रयोग गर्दै आएका छन् । यो एप्स बन्द भएपछि अमेरिकीमा एक किसिमको सन्नाटा छाएको छ । अमेरिका र चीनबीचको कुटनीतिक सम्बन्धको मार टिकटकले खेपेको छ ।