काठमाडौं । इजरायली सरकारले  हमाससँगको सम्झौता अनुमोदन गरेको छ । गाजामा युद्धविराम र बन्धकहरूलाई रिहा गर्ने सम्झौता अनुमोदन भएसँगै आइतबारदेखि लागू हुने भएको छ ।

दुवै पक्षले सम्झौताको मस्यौदालाई अन्तिम रूप दिएको बताएका छन् । गत बुधबार अमेरिका र कतारको पहलमा पहिलो पटक सम्झौता भएको घोषणा गरेका थिए ।

शुक्रबार प्रधानमन्त्री बेन्जामिन नेतान्याहुको कार्यालयले दोहामा रहेको इजरायली वार्ता टोलीले सम्झौतालाई अन्तिम रूप दिएको घोषणा गरेको थियो।

हमासले पनि एक विज्ञप्ति जारी गर्दै सम्झौताका सर्तहरूका सम्बन्धमा उठेको अवरोध समाधान भएको बताएको छ।

अमेरिकी राष्ट्रपति जो बाइडेनले पहिलो चरण ६ हप्तासम्म चल्ने र ‘पूर्ण युद्धविराम’ हुने बताएका छन् । बाइडेनका अनुसार दोस्रो चरणको उद्देश्य ‘युद्धको स्थायी अन्त्य’ हुनेछ। तेस्रो र अन्तिम चरणमा गाजाको पुनर्निर्माणका लागि छलफल हुनेछ ।

हमासले अक्टोबर ७, २०२३ मा इजरायलमा आक्रमण गरेको थियो। यी हमलाहरूमा १,२०० मानिस मारिएका थिए भने हमासले २५१ जनालाई बन्धक बनाएको थियो।

इजरायली आक्रमणमा ४६ हजारभन्दा बढीको मृत्यु भएको थियो ।