काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्ड अहिले पूर्वी नेपालमा छन् । पछिल्लो समय काठमाडौंं बाहिरका जिल्ला भ्रमणमा रहेका प्रचण्ड शुक्रबार साँझ विराटनगर पुगेका छन् ।
विराटनगरमा उनी कान्छा ज्वाइँ जीवन आचार्यको घरमा बसेका छन् । जिल्ला बाहिर रहदा कार्यकर्ताको लावालस्करसहित मर्निङवाकमा निस्कने गरेका प्रचण्डले विराटनगरमा पनि यस्तै गरेका छन् ।
तराईमा जारी बाक्लो हुस्सुको प्रवाह नगरी दर्जनौं कार्यकर्ताको लावालस्कर लगाएर पैदल यात्रामा निस्किएका हुन् । ज्वाईको घरबाट मर्निङवाकमा निस्किएका प्रचण्डले बाटोमा बसेर पूर्वी तराईको लोकप्रिय खाजा भक्का खाएका छन् ।
विराटनगरमा रहदा प्रचण्डले गिरिजाप्रसाद कोइराला क्रिकेट रङ्गशालाको अनुगमन गर्ने कार्यक्रम रहेको उनको सचिवालयले जनाएको छ ।
आज दिउँसो प्रचण्ड मोरङको ग्रामथानमा बधाई तथा खबरदारी सभामा सहभागी हुने कार्यक्रम रहेको छ ।
गत स्थानीय तहको उपनिर्वाचनमा ग्रामथानको अध्यक्ष माओवादीका नमोनारायण माझीले जितेका थिए । उपनिर्वाचनको नतिजाबाट उत्साहित प्रचण्ड पछिल्लो समय बाहिरी जिल्लाको भ्रमणमा तल्लिन छन् ।
