काठमाडौं । गाजा क्षेत्रमा १५ महिनादेखि युद्धरत इजरायल र प्यालेस्टिनी समूह हमासबीच युद्धविराम सम्झौता भएको छ । हमासले २०२३ अक्टोबर ७ मा दक्षिणी इजरायलमा आक्रमण गरेसँगै युद्ध चर्किएको थियो । युद्धका क्रममा ४८ हजारभन्दा बढीको ज्यान गएको छ ।
अमेरिका, कतार र इजिप्टको मध्यस्थतामा दोहामा भएको वार्तामा बिहीबार बिहान सहमति जुटेको हो । मध्यस्थता गरेका कतारका प्रधानमन्त्री शेख मोहम्मद बिन अब्दुल रहमान अल थानीका अनुसार युद्धविराम आइतबारदेखि लागू हुनेछ । इजरायली मन्त्रिपरिषद्ले स्वीकृत गरेपछि मात्र युद्धविराम लागू हुने बीबीसीले जनाएको छ ।
इजरेल र हमास समूहबीच भएको सम्झौताबमोजिम बन्धकहरू रिहा हुने भएपछि नेपालका विपिन जोशी पनि मुक्त हुने उनको परिवारजन र नेपाली अधिकारीहरूले आशा व्यक्त गरेका छन्।
तेल अभिभस्थित इजरेलका लागि नेपाली राजदूत धनप्रसाद पण्डितले इजरेलका राष्ट्रपतिले पनि आफूसँगको कुराकानीका क्रममा विपिन जोशी मुक्त हुने सम्भावना रहेको बताएको उल्लेख गरे।
हालै ओहदाको प्रमाणपत्र बुझाउने क्रममा इजरेली राष्ट्रपतिसँग विपिनबारे पनि संक्षिप्त कुराकानी भएको इजरेलका लागि नेपाली राजदूत धनप्रसाद पण्डितले बताए ।
विपिनका आमाबुवाले युद्धविराम सम्झौतासँगै उनको रिहाइकालागि पहल गरिदिन सरकारलाई आग्रह गरेका छन्।
कञ्चनपुरका विपिन जोशी सुदूरपश्चिम विश्वविद्यालयमा कृषिविज्ञानका विद्यार्थी हुन्।
उनी इजरेल र नेपाल सरकारबीचको सम्झौताअनुसार कृषिविज्ञानका विद्यार्थीलाई पठाइने (लर्न एन्ड अर्न) कार्यक्रमअन्तर्गत अरू विद्यार्थीसँगै इजरेल गएका थिए। उनी गाजाको सीमानजिकै एउटा कृषि फर्ममा कार्यरत थिए।
कृषि फर्ममा कार्यरत १७ जना नेपाली विद्यार्थीमध्ये १० जनाको हमासको आक्रमणमा परेर मृत्यु भएको थियो।
अरू चारजना घाइते भएका थिए भने जोशी सम्पर्कविहीन भएका थिए। अन्य दुईजना भने सकुशल थिए।
जोशीसँग एउटै फर्ममा कार्यरत रहेका र उद्धार गरेर नेपाल फर्काइएका विद्यार्थीहरूले हमासले प्रहार गरेको ग्रिनेड फालेर उनले आफूहरूलाई बचाएको बताएका थिए।
तर पछि उनलाई हमास लडाकुले लगेको ती विद्यार्थीहरूले सञ्चारमाध्यमलाई बताएका थिए।
